कर्मचारीतय्त आचरण व अनुशासनया कारवाही

येँ – सरकारं अनुशासनया पालना मयासे आन्दोनल याइपिं कर्मचारीयात कारवाही याइगु जूगु दु । सरकारं कर्मचारी समायोजन अध्यादेश–२०७५ कथं समायोजनय् मवंसे आन्दोलनय् कुहां वइपिं कर्मचारीयात कारवाही यायेगु तयारी याःगु खः । संघीय मामिला तथा सामान्य प्रशासन मन्त्रालयया प्रवक्ता सुरेश अधिकारीया कथं सरकारं संघ, प्रदेश व स्थानीय तहय् कर्मचारी समायोजन अध्यादेशकथं समायोजनय् मवंसे आन्दोलनय् कुहां वःपिं कर्मचारीयात कारवाही यायेत्यंगु खः ।

प्रवक्ता अधिकारीं निजामति कर्मचारी ऐन कथं आचरण व अनुशासनया पालना मयाइपिं कर्मचारीयात आः कारवाही यायेगु जुइ धयादीगु दु ।
समायोजनया प्रक्रियाय् मवंसे आन्दोलनय् कुहां वइपिं कर्मचारीयात निजामति सेवा ऐन–२०४९ कथं आचरण व अनुशासनया पालना मयाःगु धासें आः कारवाही यायेगु जुइ धकाः वय्कलं धयादीगु दु ।

सरकारं वंगु छुं दिं न्ह्यः जक कर्मचारी समायोजनया निंतिं अध्यादेश हःगु खः । उगु अध्यादेशया विरुद्ध निजामति कर्मचारी नापं स्थानीय तहया कर्मचारीत आन्दोलनय् कुहां वयाच्वंगु दुसा थ्व झ्वलय् स्थानीय तहया कर्मचारीतय्सं छुं दिंया निंतिं धकाः थःपिनिगु आन्दोलन स्थगित यानातःगु दु ।

सरकारं हःगु कर्मचारी अध्यादेश कथं समायोजनय् मवंसे कर्मचारीतय्सं न्हियान्हिथं धइथें देय्या प्रमुख प्रशासनिक केन्द्र सिंहदरवार परिसरय् सरकार विरुद्ध आन्दोलनय् कुहां वयेवं मन्त्रालयं कारवाहीया प्रक्रिया न्ह्यःने हःगु खः ।

मन्त्रालयया प्रवक्ता अधिकारीया कथं समायोजनय् मवनीपिं कर्मचारीयात निजामति सेवा ऐनया परिच्छेद ७ कथं आचरण व अनुशासनया बेवास्ता यासें निजामति कर्मचारीं सामाजिक संजाल, पत्रपत्रिका, लेख रचनाय् अवाञ्छित, गैर जिम्मेवारी, अनुचित व पेशागत मर्यादा अःखः अस्वाभाविक क्रियाकलाप याःगु खँय् ध्यानकर्षण जूगु धासें उकथं कारवाही यायेत्यंगु खः ।