यल लायकुलिइ सवारी निषेध यायेगु तयारी

यल– यल महानगरपालिकाया भित्री नगर दुने नं ट्राफिक व्यवस्थापन यायेगु तयारी जूगु दु । भित्री शहर दुने सवारी चाप अप्वया यल चाःहिउ वइपिं पर्यटकत हैरान जुयाच्वंगुलिं यल महानगरपालिकां ट्राफिक व्यवस्थापनया तयारी याःगु खः ।

यल महानगरपालिकाया मेयर चिरिबाबु महर्जनं यल लायकू लागाय् ‘सवारी निषेध’ यायेगु व गाडीया चाप अप्वः दुथाय् वानवे यायेगु निंतिं अध्ययन जुयाच्वंगु खँ धयादीगु दु ।
वय्कलं मुख्य यानाः लायकू लागाया लिसें पर्यटकत अप्वः वइगु लागाय् सवारी व्यवस्थापन यायेत्यनागु खँ धयादीगु खः ।

सवारी चाप अप्वः जुयाः यक्व थासय् पर्यटकतलिसे लँजुवाःतय्सं नं सास्ती फयेमालाच्वंगु खँ न्ह्यथँसें मेयर महर्जनं धयादीगु दु, ‘निश्चित इलय् बाहेक मेबलय् सवारी साधन चले याके मबिइगु खँ तयारी जुयाच्वंगु दु ।’

ट्राफिक व्यवस्थापनया निंतिं ट्राफिक प्रहरी, यलया थीथी जातीय खलः–पुचः, स्थानीयवासी, सरोकारवाला निकायलिसे सहलह ब्याकाच्वंगु दु ।

वइगु वैशाख १ गते निसें लागू यायेगु योजना महानगरपालिकाया दु । ‘थुकिया निंतिं अध्ययन व सहलह जुयाच्वंगु दु’ मेयर महर्जनं धयादीगु दु । छुं दँ न्ह्यवनिसें यलया ग्वार्कों मंगलबजार जुयाः पुल्चोक वनेगु लँ वानवे यानातःगु खः । गुकिं यानाः थन सवारी व्यवस्थापन जुयाः लँजुवाःतय्त सहज जुयाच्वंगु दु ।