कर्मचारीया खँय् नं प्रदेश विवाद

लोकसेवां प्रदेशया लागिं विज्ञापन मयानागु दावी

येँ – कर्मचारी परिपूर्ति यायेगु सवालय् प्रदेश नं. २ या मुख्यमन्त्री लालबाबु राउतं लोकसेवा आयोगयात पौ च्वयाः थःपिनि लागिं कर्मचारी मागे यायेगु विज्ञापन याये मते धकाः इनाप यायेवं संघीय सरकार व प्रदेश दथुइ विवाद शुरु जूगु दु । प्रदेश २ या सरकारं लोकसेवायात पौ च्वयेवं उकियात सामान्य प्रशासन मन्त्री लालबाबु पण्डितं हे लिसः बिसें प्रदेश सरकारया पौ पाय्छि मजूगु खँ धयादीगु दु ।

प्रदेश सरकारं छुं ई न्ह्यः तक थःपिंत कर्मचारी मगाः, सरकारं कर्मचारी हे छ्वया महः धकाः गुनासो यानाच्वंगु व आः थःपिंसं कर्मचारी छ्वया बी धकाः पहल यानाबलय धाःसा हानं अःखतं थःपिनि ज्याय् हस्तक्षेप यात धकाः गुनासो याःगु पाय्छि मजुल धयादीगु दु ।

न्हापा प्रदेश सरकारय् कर्मचारी मगाः धकाः गुनासो वयाच्वंगु व अज्याःगु इलय् संघीय सरकारं वास्ता मयाः धकाः नं प्रदेश सरकारं हे आलोचना याःगु खँ लुमंकुसें मन्त्री पण्डितं आः उमिगु हे समस्या समाधान यायेगु लागिं कर्मचारी छ्वयेत्यनागु इलय् धाःसा थःपिनिगु ज्याय् हस्तक्षेप यात धकाः आलोचना याना हःगु द्वपं नं बियादीगु दु ।

लिसें प्रदेश सरकारया पौयात कयाः लोकसेवा आयोगं नं आलोचना याःगु दु । प्रदेश सरकारया लागिं कर्मचारी माल धकाः लोकसेवा आयोगं आः तक विज्ञापन हे पिमकाःगु खँ नं लोकसेवा आयोगया प्रमुख आयुक्त उमेश मैनालीं कनादीगु दु । प्रदेशया लागिं लोकसेवां कर्मचारी कायेत विज्ञापन याइन धकाः छगू पत्रिकाय् समाचार पिहां वःगु आधारय् प्रदेश सरकारं अज्याःगु पौ छ्वया हःगु खँ धासें वय्कलं अथे खँ हे मथुइकेसे पौ च्वयेगु प्रदेश सरकारया अपरिपक्व ज्या जुल धकाः नं आलोचना यानादीगु दु ।

प्रदेश सरकार प्रमुखं धाःसा संविधानय् हे प्रदेश सरकारं प्रदेशय् कर्मचारी भर्ना यायेत प्रदेशया लोकसेवा आयोगं ज्या याइ धकाः च्वयातःगु कारणं थःपिंसं वहे कथं ज्या यानाच्वनागु दावी यानादीगु दु । तर संघीय सरकारं धाःसा वहे संविधानय् प्रदेशया लोकसेवा आयोग मदुतले केन्द्रया लोकसेवां कर्मचारी छ्वइ धकाः दावी याःगु दु ।

येँ मनपाय् न्हूम्ह प्रशासकीय अधिकृत

येँ – येँ महानगरपालिकाया न्हूम्ह प्रशासकीय अधिकृत कथं केदार न्यौपाने वःगु दु । मन्त्रिपरिषदं येँ मनपाया यादव कोइरालायात संघीय मालि तथा सामान्य प्रशासन मन्त्रालयं सरुवा यायेवं न्यौपाने येँ मनपाया प्रशासकीय अधिकृत कथं वःगु खः । न्यौपाने थ्व स्वयां न्ह्यः प्रदेश नम्बर १ या मुख्यमन्त्री तथा मन्त्रिपरिषद्या कार्यालयया प्रमुख सचिव जुयाः ज्या याना वयाच्वंम्ह खः ।

 

 

सम्बन्धित बुखँ

LEAVE YOUR COMMENTS