त्रिकोणात्मक टी–२० सिरिज : नेपाः निगू रनं बुत

येँ (नेपालभाषा टाइम्स)- नेपाः, नामिबिया व नेदरल्याण्ड्स दथुइ किपुलिइ जुयाच्वंगु त्रिकोणात्मक टी–२० सिरिजया निगूगु कासाय् नं नेपाः पराजित जूगु दु । बुधवाः जूगु प्रतिस्पर्धात्मक कासाय् नेपाःयात नेदरल्याण्ड्सं निगू रनं बुकूगु खः । कासाया अन्तिम ओभरय् नेपाःया निगू विकेट वनेवं पराजय फयेमाःगु खः ।

टियु मैदानय् जूगु कासाय् न्हापां ब्याटिङ यासें नेदरल्याण्ड्सं निर्धारित २० ओभरय् प्यंगू विकेटया क्षतिइ १८४ रन दयेकूगु खः । नेदरल्याण्ड्सया निंतिं टी–२० इ डेब्यु याःम्ह माइकल लेभिटं ५४ रन दयेकूगु खः । अथेहे नेदरल्याण्ड्सया कप्तान स्कट इडवार्डसं ३३ रन, इंगेलब्रेक्टं ४९ रन व निडामानुरुं ३१ रन दयेकूगु खः । नेपाःया निंतिं करण केसी व कुशल मल्लं छगू छगू विकेट काःगु खःसा निम्ह कासामि रन आउट जूगु खः ।

नेदरल्याण्ड्सं बिउगु १८५ रनया लक्ष्य ज्वनाः मैदानय् वःगु नेपालं निर्धारित २० ओभरय् च्यागू विकेटया क्षति १८२ रन दयेकूगु खः । नेपाःया निंतिं उत्कृष्ट कासा म्हितूम्ह दिपेन्द्रसिंह ऐरीं खुगू चौका व स्वंगू छक्का प्रहार यासें ६२ रन दयेकूगु खः । अथेहे नेपाःया कप्तान रोहित पौडेलं ५० रन, आसिफ शेखं ३४ रन, कुशल मल्लं ११ रन, सन्दिप जोरां ८ रन, सोमपाल कामीं ११ रन दयेकूगु खः । नेपाःया ओपनर कुशल भुर्तेल धाःसा झ्वलाक्क निक्वखुसी शून्य रनय् आउट जूगु खः ।

कासाय् नेपाःयात अन्तिम ओभरय् मुक्कं १५ रन माःगु खः । अन्तिम ओभर नेदरल्याण्ड्सपाखें भान मर्वं बलिङ याःगु खः । न्हापांगु निगुलिं बलय् दिपेन्द्रं छक्का व चौका प्रहार यासें नेपाःयात त्याकेगु संकेत याःगु खः तर व धुंकाः करण केसी रन आउट जुलसा मेगु बलय् दिपेन्द्र बोल्ड जूगु खः । कासाया अन्तिम बलय् नेपाःयात प्यंगू रन माःगु खः ।

नेपालं सिरिजया मेगु कासा शुक्रवाः नामिबियालिसे व शनिवाः नेदरल्याण्ड्सलिसे म्हिती । बिहिवाः नामिबिया व नेदरल्याण्ड्स दथुइ कासा जुइ ।