वीर अस्पतालय् नं कोरोना परीक्षण सुरु

येँ – येँया वीर अस्पतालय् नं आः कोरोना परीक्षणया ज्या सुरु जूगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं शनिवाः निसें वीर अस्पतालय् नं परीक्षण सुरु जूगु खः ।

थ्वनापं आः येँय् कोरानाया परीक्षण यायेगु थाय् निगू थ्यंगु दु । थ्वस्वयां न्ह्यः टेकुइ च्वंगु राष्ट्रिय जनस्वास्थय प्रयोगशालाय् जक कोरोनाया परीक्षण जुयाच्वंगु खः । आइतवाः निसें टेकुया अस्पतालय् नं परीक्षण जुइगु खँ प्रवक्ता देवकोटां कनादीगु दु ।

मन्त्रालयया कथं शनिवाः तक ४ हजार ४ सय २६म्ह मनूतय् नमुना परीक्षण जुइधुंकूगु दु । उकी मध्ये ३ हजार ३ सय ९२म्हेसिया राष्ट्रिय जनस्वास्थ्य प्रयोगशालाय् नमुना परीक्षण याःगु खःसा मेगू थीथी प्रदेशय् परीक्षण याःगु खः ।