अप्वया वनाच्वंगु बाल यौन दुव्र्यवहार

लिपांगु इलय् मिसा मस्त यौन दुव्र्यवहार व बलात्कार शिकार जुइगु क्रम अप्वया वनाच्वंगु दु । सूचना प्रविधिया विकासलिसें मचाअधिकार संवद्र्धनसम्बन्धी सम्बन्धित सरोकारवालातय् कुतः, बहस व पैरवी जुइकजुइकं नं गुलिखे प्रवृत्तिगत सामाजिक गलत मूल्य–मान्यता व अन्धविश्वासया कारणं नं मिसा मस्त नापं मिजं मस्ततकं यौन दुव्र्यव्हारया शिकार जुइगु यानाच्वंगु दु ।

थ्व सम्बन्धय् अधिकांश घटना पिहां वःसां नं गुलिखे घटना पिहां वये फयाच्वंगु मदु ।केन्द्रीय बाल कल्याण समितियाकथं थीथी संचारमाध्यमय् पिहां वःगु मस्तय् सम्बन्धी थीथी घटना चालु आर्थिक दँया न्हापां प्यलयाया अवधिया स्थिति विश्लेषण यायेबलय् ९८ म्ह मस्त बाल यौन दुव्र्यवहार व बलात्कार जूगु घटना पिहां वःगु दु ।

थ्व अवधिइ छम्ह विदेशी नागरिकपाखें यौन दुव्र्यवहारय् लाःगु दुसा मेपिं ९७ म्ह मिसा मचा बलात्कृत जूगु दु । स्वीस नागरिक पिटर धाइम्ह मनुखं फेसबुकपाखें चिनजान यानाः नेपाः वयाः मस्तय्त यौन दुव्र्यवहार याःगु खः । वयात कयाः कानुनी कारवाही न्ह्यःने न्ह्याकूगु दु । मिसा मस्त बलात्कार जूगु घटनामध्ये १२ म्ह मिसा मचा सामूहिक बलात्कारय् लाःगु समितिया सूचना अधिकारी रामबहादुर चन्दं जानकारी बियादिल ।

घटनायात स्वयेबलय् सामूहिक बलात्कारय् लाःपिं निम्ह मिसा मचा सुस्तमनस्थितया खः । बलात्कारया घटनायात विश्लेषण यायेबलय् दकलय् अप्वः म्हसिउम्ह व्यक्तिपाखें ३६ म्ह मिसा मचा बलात्कार जूगु समितिं न्ह्यथंगु दु ।प्रतिवेदनकथं जःलाखःलापाखें १९, थःहे अबु वा हाडनातापाखें १७, प्रधानाध्यापक व शिक्षकपाखें खुम्ह, सरकारी कर्मचारीपाखें स्वम्ह, घरेलु बालश्रमय् दुपिं प्यम्ह व म्हमसिउम्ह मनूपाखें ११ म्ह मिसा मचा बलात्कृत जूगु दु ।

हाडनातापाखें बलात्कार जूपिं १७ म्हमध्ये गुम्ह मिसा मचा थः हे अबुपाखें बलात्कार जूगु दु । बलात्कारय् संलग्न अभियुक्तमध्ये मिजं मचा हे जूगु व ६० दँ स्वयां च्वय्यापिं व्यक्तिपाखें न्हय्म्ह मिसा मचा बलात्कृत जूगु सूचना अधिकारी चन्दया धापू दु ।

बलात्कारपाखें पीडित जूपिं मिसा मचाया उमेर समूहया लिधंसाय् विश्लेषण यायेबलय् न्यादँ वा व स्वयां क्वय्यापिं गुम्ह, खुदँनिसें झिदँया १९, झिंछदंनिसें झिंप्यदँया ४४म्ह, झिंन्यादँनिसें झिंच्यादँया २५ मिसा मचा दु । समितिया पुलांम्ह कार्यकारी निर्देशक तारक धितालं मस्तय्त हिंसा, दुव्र्यवहार, शोषण, भेदभाव, अपहरण, उपेक्षा, हेपे यायेगु व बेवास्ता यायेगु थेंज्याःगु हानिकारक अभ्यासपाखें संरक्षण यायेगु मुख्यत अभिभावकया दायित्व खः धयादी ।

दकलय् म्हो उमेरया महोत्तरीइ च्याला जक दुम्ह मिसामचायात अपरहरणपश्चात बलात्कार यानाः हत्या याना बिउगु खःसा ११ निसें १४ दँ उमेरया मिसामस्त अप्वः ल्याखय् बलात्कारपाखें पीडित जूगु दु । उगु घटनामध्ये दकलय् अप्वः चर्चाय् दुगु कञ्चनपुरया १३ दँ दुम्ह मिसा मचा निर्मला पन्तया बलात्कारलिपा हत्या याःगु घटनाया विषयय् आतक नं सत्यतथ्य पिहां वयाच्वंगु मदुनि ।

तर अनुसन्धान जारी दु । सत्यतथ्य पत्ता लगे यायेगु बारे प्रतिपक्ष राजनीतिक दलया नेतातय्सं संसदय्तकं तःक्वः तःक्वः सः तयेगु याना वयाच्वंगु दु । थ्व अवधिइ ४६ गू जिल्लाय् जूगु जम्मा घटनामध्ये जिल्लागत रुपय् विश्लेषण यायेबलय् दकलय् अप्वः सप्तरी व पाल्पाय् न्याम्ह–न्याम्ह मिसा मचा बलात्कारपाखें पीडित जूगु दु ।

मिसा मस्त यौन दुव्र्यवहारपाखें जक मखसे बलात्कार, बालविवाह, हत्या, बालश्रम, बेचबिखन व ओसारपसार, अपहरण व मस्तय्त कयाः जुइगु शारीरिक व मानसिक सजायपाखें तकं पीडित जुइ मालाच्वंगु दु ।

मचा यौन दुव्र्यवहार अन्त्य यायेगु खः धइगु जूसा सरकार व सरोकारवाला संघसंस्थां मस्तय् हकहित व अधिकारया निंतिं निर्माण यानातःगु संविधान, ऐन÷कानून व नीतिगत व्यवस्थाया प्रभावकारी कार्यान्वयन यायेमाःगु खनेदु । मचा यौन दुव्र्यवहार न्ह्याम्हेसियापाखें नं न्ह्यागु थासय् नं जुइ फइगु जूगुलिं थ्व बारे मस्तनिसें अभिभावकतक सकलें सतर्क, सचेत व सजग जुयाच्वनेमाःगु आवश्यक दु ।