जय बागेश्वरीइ रोपाइँ व खड्गजात्रा

येँ(नेपालभाषा टाइम्स)- दँय्दसं गुंलागा पारुनिसें अस्तमि च्यान्हुतक स्वनिगलय् गुंपुन्हिया लसताय् थीथी थासय् थःथःगु हे संस्कृति, परम्पराकथं सापारु थीथी ज्याझ्वः हनेगु परम्परा दया वयाच्वंगु दु । थ्व झ्वलय् स्वनिगःया दकलय् पुलांगु वस्तीकथं कयातःगु ग्वल देय् अर्थात जय बागेश्वरीइ नं आइतवाःनिसें रोपाइँ व खड्ग जात्रा शुरु जूगु दु ।

सापारुया स्वन्हुलिपा शुरु जुइगु ग्वलया रोपाइँ व खड्ग जात्राय् थुगुसी स्थानीयवासीलिसें ल्याय्म्हतय् उल्लेख्य सहभागिता खनेदत । लिपांगु इलय् स्थानीय ल्याय्म्हतय्सं सांस्कृतिक महत्वया प्याखनय् सहभागिता मक्यंगु कारणं लोप जुइगु अवस्थाय् थ्यनेधुंकूगु स्थानीय ग्वलवासीया धापू दु ।

जयबागेश्वरीलिसें पशुपति लागाया छुं छुं थासय् हनीगु परम्परागत जात्रा, संस्कृतिइ ल्याय्म्हत निष्क्रिय जुइवं ऐतिहासिक, धार्मिक व सांस्कृतिक महत्वया प्याखंत लोपोन्मुख अवस्थाय् थ्यंगु स्थानीयतय् धापू दु ।

आः वयाः अज्याःगु जात्रा, पर्व संस्कृति हनेगुलिइ चिउताः क्यनाः स्थानीयतय् ल्याय्म्ह सक्रिय रुपं सहभागि जूगुलिं अज्याःगु संस्कृति संरक्षण, संवद्र्धन जुइगु विश्वास स्थानीयं प्वंकूगु दु ।

छुं नं मौलिक कला, सांस्कृतिक सम्पदा संरक्षणया निंतिं स्थानीयवासी व ल्याय्म्हत हे सक्रिय जुइमाःगु बागमति प्रदेशया पुलांम्ह प्रदेशसभा सदस्य नरोत्तम वैद्यं कनादिल । लिसें अज्याःगु सांस्कृतिक महत्वया सम्पदा ल्यंकेत स्वंगुलिं तहया सरकारं समन्वय यानाः संरक्षण यायेमाःगु नं वय्कलं धयादीगु दु ।