‘नेपाल मण्डल’या पक्षय् दुइ तिहाइ !

येँ – प्रदेश नम्बर ३ या नां ‘नेपाल मण्डल प्रदेश’ तयेगु सवालय् नेपाल कम्युनिष्ट पार्टीया दुइ तिहाई सांसदतय्सं सहमति क्यनेधुंकूगु खँ धाःगु दु ।

प्रदेशय् नवगठित नेपाल कम्युनिष्ट पार्टीया सांसद लिसें केन्द्रीय दुजः बसन्त मानन्धरं थुकिया जानकारी बियादीगु खः । म्हीग ख्वपय् जूगु भक्तपुर जिल्ला मानन्धर युवा संघयाया घोषणा सभाय् न्ववासें वय्कलं थुकिया जानकारी बियादीगु खः ।

प्रदेशया नां नेपाल मण्डल तयेमाः धकाः थःगु पार्टी दुने प्रस्ताव समेत दर्ता जुइधुंकूगु खँ कँसें वय्कलं उकिया पक्षय् पार्टीया दुइ तिहाई सांसदतय्सं सहमतिया संकेत बीधुंकूगु खँ नं अन कनादिल ।

एमाले व माओवादी एकीकरण जुयाः निर्माण जूगु तःधंगु नेपाल कम्युनिष्ट पार्टीया दुई तिहाइ सांसदतय्सं यदि उकी सहमति क्यन धाःसा संसदय् थ्व नां अःपुक हे पास जुइगु सम्भावना दु । नां पारित यायेत सामान्य बहुमत जक दःसां गाः ।

३ नम्बर प्रदेश दुने नेपाल मण्डलया अस्तित्व न्हापा लिच्छबीकालंनिसें दुगु खँ कँसें वय्कलं पृथ्वीनारायण शाहं नेपाः त्याकूगु इलय् तक नं नेपाल मण्डलयात अलग मयासे थ्वहे प्रदेश दुने लाका तःगु खँ नं वय्कलं कनादिल ।

अथे हे सांसद मानन्धरं प्रदेशया राजधानी हेटौंडापाखें चीकाः मेथाय् यंके फुगु संकेत नं बियादीगु दु । राजधानी सारे यायेगु लागिं पहल जुयाच्वंगु व उकिया लागिं कार्यदल समेत गठन यानाः ज्या न्ह्यानाच्वंगु खँ कनादीसां न्हूगु राजधानी गन तइ धइगु खँ धाःसा वय्कलं कनामदी ।

सम्बन्धित बुखँ

LEAVE YOUR COMMENTS