सरकारं भ्याट उठे यायेमफु : महालेखा

येँ – महालेखा परीक्षकया कार्यालयं थीथी सेवाय् कया वयाच्वंगु मूल्य अभिवृद्धि कर (भ्याट) अझं बछि धयाथें उठे याये मफयाच्वंगु खँ धाःगु दु । महालेखा परीक्षकया कार्यालयं म्हये मफयाच्वंगु भ्याट म्हयेत व भ्याटं छुटे जूगु क्षेत्रयात नं करया दायरा हयेत सरकारयात धाःगु दु ।नकतिनि क्वचाःगु लेखा परीक्षणय् छगू खर्ब ३२ अर्ब स्वयां अप्वः भ्याट म्हये मफुगु खनेदुगु खः ।

सरकारं २१ दँ न्ह्यव आन्तरिक राजश्वया मू आधार कथं जुयाच्वंगु वस्तु व सेवाय् मूल्य अभिवृद्धि कर (भ्याट) कायेगु सुरु याःगु खः । सुरुया इलय् करदाता शिक्षा व कर पालना याइगु म्हो जक जुइगु जूगुलिं कर म्हये मफुगु खः, तर आःतक नं कर म्हयेगु ज्याय् धाःसा सुधार मजूगु खँ महालेखा परीक्षका कार्यालयं धाःगु दु ।महालेखाया कथं आःतक मूल्य अभिवृद्धि कर जक थ्यंमथ्यं ४६ प्रतिशत म्हये मफयाच्वंगु दु ।

प्रति व्यक्ति आम्दानीया आधारय् पिकाःगु थ्व तथ्यांक कथं थ्व सरकारं थ्व ध्यबा म्हये फयेमाःगु खँ धाःगु दु ।उपमहालेखा परीक्षक रामुप्र्रसाद डोटेलं भ्याटया दायरया हयेफइगु सम्भावित क्षेत्र कथं शेयर दलालं काइगु कमिशन, मनि ट्रान्सफर, चिकित्सा परामर्श सेवा, स्कूलय् संचालन जुइगु क्यान्टिन, आवास थेंज्याःगु थासं भ्याट म्हयेफइगु खँ धाःगु दु ।

वय्कलं राज्यं अनुगमन व प्रशासनिक व्यवस्थाय् सुधार यात धाःसा थुगु थासय् कर म्हयेफइगु अवस्था दुगु खँ नं धयादीगु दु । अर्थ सचिव राजन खनालं नीतिगत सुधार यायेमाःसा आर्थिक ऐन लगायतया कानुनय् सुधार यानाः कर दायरा हयेगु व कार्यान्वयनया समस्या दुसा क्षमता अप्वयेकाःसा भ्याट उठे यायेगु खँ धयादीगु दु ।

सम्बन्धित बुखँ

LEAVE YOUR COMMENTS