कन्हय् स्वक्वःगु हलिं नेवाः तःमुँज्या

येँ – हलिं नेवाः दबू (वल्र्ड नेवाः अर्गनाइजेशन–डब्लुएनओ) या स्वक्वःगु तःमुँज्या कन्हय्निसें येँय् शुरु जुइत्यंगु दु । थ्व झ्वलय् तःमुँज्याय् ब्वति काः झाःपिं दुजःपिनि हनाय् थौं यलया भन्दाः क्यबय् छगू परिचयात्मक ज्याझ्वः याइगु ग्वसाः दु ।स्वक्वःगु तःमुँज्याया औपचारिक ज्याझ्वः धाःसा कन्हय् येँया राष्ट्रिय सभागृहय् शुरु जुइ ।

वाङ्मय शताब्दी पुरुष सत्यमोहन जोशीं कन्हय् ११ बजे सभागहय् छगू ज्याझ्वःया दथुइ तःमुँज्याया उलेज्या यानादीगु ज्याझ्वः दु ।
उलेज्या समारोह अतिकं झःझः धाइगु व उकिया लागिं विशेष कथंया तयारी जूगु खँ तःमुँज्याया स्थानीय ग्वसाः खलः कजि पुष्कर माथेमां ‘नेपालभाषा टाइम्स’ यात कनादीगु दु ।

थ्व तःमुँज्यायात सार्थक यायेगु लागिं ग्वसाः खलकं नेवाः सरोकारलिसे स्वापू दुगु थीथी न्यागू विषयय् न्यागू हे अन्तक्र्रिया यायेगु ज्याझ्वः नं दयेका तःगु दु । कन्हय् उलेज्या लिसें अन्तक्र्रिया याइगु ज्याझ्वः दुसा शनिवाः छगू तःजिगु ¥याली पिकासें निक्वःगु विश्व नेवाः दिवस हनीगु ग्वसाः दु ।

शनिवाः सुथय् ८ बजे येँया बसन्तपुली मुनाः छगू ¥याली पिहां वइ । थ्व ¥याली नं येँ देय्या थीथी लागा चाःहिलाः हानं सभागृहय् तुं वनाः छगू सभाय् परिणत जुइ । थ्वहे दिवसया लसताय् नेवाः ख्यलय् ज्या यानाच्वंपिं झिम्ह थीथी नेवाः व्यक्तित्वपिंत हनीगु नं ज्याझ्वः दु ।
लिसें रञ्जना लिपिया क्यालिग्राफी यानाः लिपिया कार्यशाला गोष्ठी नं याइगु ग्वसाः दुसा उकिया नापनापं नेवाः कला व संस्कृतिया विशेष ब्वज्या नं याइगु ग्वसाः दु ।

तःमुँज्याय् ब्वति कायेगु लागिं हलिं नेवाः दबूया नायः सिजन श्रेष्ठ व वरिष्ठ न्वकु दया शाक्यपिं नेपाः थ्यंकः झायेधुंकूगु दु । थुगुसी न्हूगु नेतृत्व ल्ययेगु झ्वलय् वय्कःपिं निम्हं दत्या दत्या तक नायः जुयाः थ्व कार्यकालयात विशेष रुपं सम्पन्न यायेगु सहमति जुइधुंकूगु दु । मेपिं पदाधिकारीपिं धाःसा तःमुँज्याया हलं हे ल्यइगु ग्वसाः दु ।

हलिं नेवाः दबुलिं दँय्दसं मार्चया अन्तिम शनिवाः नेवाः दिवस हनेगु धकाः निर्णय याः कथं थुगुसी निक्वः हलिं नेवाः दिवस हनेत्यंगु खः । थ्व दिवस नेपालय् थीथी ज्याझ्वः यानाः हँ थें विश्वया थीथी थासय् च्वंपिं नेवाःतय्सं नं थःथःगु कथं हनीगु खँ धाःगु दु ।

सम्बन्धित बुखँ

LEAVE YOUR COMMENTS