क्यानेडियन नेवाः गुथिया हलिं नेवाः दिं हनाज्याझ्वः

येँ(नेपालभाषा टाइम्स)- क्यानेडियन नेवाः गुथिं थीथी ज्याझ्वः यासें न्याक्वःगु हलिं नेवाः दिवस हंगु दु । गुथिया ग्वसालय् थ्व हे वंगु मार्च २६ कुन्हु थीथी ज्याझ्वः यासें न्याक्वःगु हलि नेवाः दिवस हंगु खः ।

गुथिया नायः प्रकाश प्रधान व गुथिया ज्याथम्ह आजीवन दुजः लक्ष्मणमुनि श्रेष्ठं मंकाःकथ त्वाःदेवाय् मत च्याकाः उलेज्या यानादीगु खः । गुथिया नायः प्रधानं कोरोना संक्रमणया कारणं वंगु निदँ न्ह्यःनिसें भौतिक उपस्थितिइ हने मखनाच्वंगु दिवस थुगुसी सकलें छथाय् मुनाः ज्याझ्वः याये खंगुलिं लसता प्वंकादिल । अथे हे मेम्ह पाहां श्रेष्ठं न्याक्वःगु विश्व नेवाः दिवसया लसताय् भिंतुना बियादीगु खः ।

गुथिया मूछ्याञ्जे विमलमान श्रेष्ठं लसकुस यासें गुथिपाखें याकनं भाषा शिक्षण ज्याझ्वः न्ह्याकेगु नापं गुथिपाखें वइगु दिनय् यायेगु ज्याझ्वःया बारे जानकारी बियादीगु ज्याझ्वलय् रञ्जना सैंजू, डा. अमर सैंजू व उत्तम माकजुया पुचलं मंगल धुन न्ह्यब्वयादीगु खः ।
गुथिया न्वकु उत्तम माकजुं विश्वन्यंकं न्यनाच्वंपिं नेवाः समुदाययात ग्वाहालि यायेगु ल्याखं हे विश्व नेवाः दिवस हनेगु याना वयाच्वंगु खः धासें नेवाः समुदायय् थीथी संस्कारय् छ्यलीगु सुकुन्दाया विषयय् नुगःखँ तयादीगु खः ।

गुथिया ज्यासना पुचःया दुजः डा. प्रज्वल प्रधानं नेवाःतय् छेँया स्वरुप व छेँखाय् दइगु झ्याःया बारे विशेष न्वचु बियादिसें नेवाःतय् छेँया तल्लापतिकं झ्याःया संरचना व स्वरुप बिस्कं बिस्कं जुइ धयादिल । नेवाःतय् छेँय् दइगु संझ्याः व तिकिझ्याःया विशेषता बारे कनादिसें अज्याःगु छेँय् पारिवारिक गोप्यता, निभाः वइगु व वातावरणमैत्री कथं निर्माण यानातःगु दइ धयादिल ।

ज्याझ्वलय् नेपाली क्यानेडियन क्रिकेट क्लबया नायः किरोज श्रेष्ठ, मुगा राजभण्डारी, गुथिया जनसम्पर्क प्रमुख मिलि राजभण्डारी, दुजः रञ्जना सैंजू, गायत्री कायस्थ लगायतं गुथिया वेबसाइ, मिसा समितिया गतिविविध, गुथिइ मिसातय्गु भूमिका विषययात कयाः थःथःगु नुगःखँ तयादीगु खः ।

गुथिया दुजः डा. कृष्ण कायस्थं नेवाः संस्कृति, सम्पदा व गौरवया विषयय् चिनाखँ न्ह्यब्वयादीगु ज्याझ्वलय् गुथिपाखें याकनं हे योग कक्षा संचालन यायेगु नं जानकारी बिउगु खः । उगु इलय् नेवाः भाय्, कला, संस्कृृति, सम्पदा, इतिहास आदि विषयय् न्ह्यसः लिसः कासा नं याःगु खः ।