संघीय लोकतान्त्रिक गणतन्त्रया राष्ट्रपिता

नानीकाजी सापू

नेपाल संवत्या प्रवर्तक, देय्या छम्ह सपूतलिसें उगु इलय् नेपाःमिया त्यासा दक्वं पुलाः त्यासां मुक्त याना बिउम्ह मुक्तिकामि, राष्ट्रिय विभूति शंखधर साख्वाःया पूर्णकदया झ्वाता शंखधर उद्यान (पुलांगु रत्नपार्क)य् धस्वाकेगु गुगु ज्या जुल व छगू तसकं गौरवमय ज्या सावित जूगु दु। खतुं थुगु हे न्हिपती थगुने ‘शंखधर पार्क दत, झ्वाता मदुनि’ धइगु शिर्षकय् छकूचा थःगु नुगःखँ तयादीगु खः, थुगुसी व नं पूरा जुल । उकिया निंतिं येँ महानरपालिकाया मेयर भाजु विद्यासुन्दर शाक्ययात आपालं आपाः सुभाय् देछानाच्वना ।

शंखधर उद्यानय् राष्ट्रिय विभूति शंखधर साख्वाःया झ्वाता धस्वाकूगु हे न्हिकुन्हु संघीय गणतान्त्रिक नेपाःया छम्ह सर्वोच्च सेनानी, नेपाः मांया मेम्ह सपूत, झीगु भाषा आन्दोलनया न्ह्यलुवा, अले नेपाल संवत्या सांस्कृतिक आन्दोलनया न्ह्यलुवा मदुम्ह पद्मरत्न तुलाधरया झ्वाता नं धस्वाकेगु ज्या जुल । थ्व झी सकल नेपाःमिया निंतिं मेगु गौरवया विषय जुया बिउगु दु। छाय्धाःसां पद्मरत्न छम्ह व्यक्ति मखसे अथाह महासागर खः, गुम्हेसिनं चिचिधिंगु खुसिचानिसें ततःधंगु खुसितकं प्रतिनिधित्व यानाच्वंगु दु। गथे दक्वं खुसि थवंथवय् समाहित जुयाः पृथ्वीया कुं कुलामय् थ्यंक फू चायेकाः सुन्दर व हराभरा ग्वाहालि यानाच्वंगु दइ, अथे हे पद्मरत्न तुलाधरया मू ताः धइगु नं थ्व हे खयेमाः धइगु झीसं थुइके फु ।

पद्मरत्न तुलाधरया बारे न्ह्याक्व हे च्वःसां नं गाइमखु। वय्कः छम्ह सादा जीवन, महान विचार, सरल स्वभाव, न्ह्याबलें नं न्हिलासुं जाःम्ह लोभ, लालच, मोह, क्लेश, द्वेष धइगु भ्याःभचा हे मदुम्ह स्वच्छ छविया व्यक्तित्व खः । छम्ह च्वन्ह्याःम्ह साहित्यकारलिसें स्वतन्त्र वाम विचार व मानवअधिकारवादी न्ह्यलुवा नं खः वय्कः । छम्ह सच्चा समानतावादी, पहिचानवादी व राष्ट्रवादी नेता खः वय्कः ।

देय्या सकल आदिवासी जनजाति, दलित, उत्पीडित, मिसा जाति, भाषा, जाति, संस्कृति, धर्म, आर्थिक व शैक्षिक आदिया विकासलिसें देय्या राज्यसत्ताय् सकलें जाति व वर्गया पहुँच दयेमाः धइगु वय्कःया विचाः खः । अथे हे संविधानय् हे सकलें जातजाति, वर्ग, समुदायया नं समान हक अधिकार दयेमाः, संविधान सकसिनं थःगु अपनत्व ग्रहण याये फइगुकथंया जुइमाः, संविधानय् हे सकसिनं थःथःगु ख्वाःपाः खनेदयेमाः धइगु उच्च विचाः तयादीम्ह नेता नं खः ।

राष्ट्रिय स्वाधिनताया निंतिं देय् व जनतायात सर्वोपरी थाय् बीमाः धइगु वय्कःया सः खः । देशय् विद्यमान दक्वं राजनीतिक पार्टीयात छथाय् मुंकाः छधीछप्पँ याकाः राजतन्त्र क्वःथलेत अग्रणी भूमिका म्हितादीम्ह छम्ह कुशल नेता जक जननेता नं खः वय्कः । मदुम्ह पद्मरत्न तुलाधर छम्ह अतुलनीय, अग्रणी, राष्ट्रिय स्वाधिनताया सवालय् न्ह्याबलें नं जनतायात सुसूचित याना वयाच्वनादीम्ह कुशल व ज्वःमदुम्ह राजनेता खः । थौं वय्कः झीगु न्ह्यःने मदयेधुंकल ।

वय्कः मदयेधुंकाः जूसां थौंया संघीय लोकतान्त्रिक गणतन्त्रात्मक व्यवस्थाय् समाहित सकल राजनीतिक पार्टीया नेतातय्सं पद्मरत्न तुलाधरयात ‘राष्ट्रपिता’ घोषणा यानाः वय्कःया झ्वाता सकसिनं खने दयेक फिब्व ख्यलय् धस्वाकेगु कुतः यायेमाः । फिब्व ख्यः धइगु थाय् छगूकथं राष्ट्रिय जक मखु, अन्तर्राष्ट्रिय रुपं नं नांजाःगु थाय् खः । छम्ह अन्तर्राष्ट्रियस्तरय् हे च्वन्ह्याःम्ह व नांजाःम्ह नेताया झ्वाता सितिमिति थासय् व उखेंथुखें गुगुं ध्याकुनय् तयेगु ल्वःगु ज्या जुइमखु। उकिं वय्कःया झ्वाता अन्तर्राष्ट्रियस्तरय् हे नांजाःगु थाय् फिब्व ख्यलय् हे तयेगु बुद्धिमानी ज्या जुइ । छम्ह भिंम्ह नेता, झीम्ह नेताया झ्वातां सकसितं भिंगु लँपुइ जुइत, भिंगु व सत्मार्गय् वनेत मार्गनिर्देशित व उत्प्रेरित यानाच्वनी ।

सम्बन्धित बुखँ

LEAVE YOUR COMMENTS