नेवाः पुरोहित तालिम क्वचाल

येँ – नेवाः पुचः इटहरीया ग्वसालय् इटहरीइ न्ह्यानाच्वंगु नेवाः पुरोहित तालिम क्वचाःगु दु । वंगु असार ९ गतेनिसें न्ह्याःगु नेवाः पुरोहित तालिम छगू ज्याझ्वःया दथुइ समापन जुल ।

तालिम समापनय् मेची जोशी समाजया नायः नापं नेवाः पुरोहितया अभियन्ता सनतकुमार जोशीं सरकारं हे शिक्षा नीति सुधार यानाः मांभासं आखः ब्वने दइगु व्यवस्था यायेमाःगु व उकिया निंतिं पाठ््यसामग्री नं पिथनाः भाषा व संस्कृति संरक्षणया निंतिं संघ, प्रदे व स्थानीय तह स्वंगुलिं सरकारं जायेमाः धयादिल ।

तालिमया प्रशिक्षक गजानन्द राजोपाध्यायं तालिमय् थम्हं सैद्धान्तिकरुपं हे स्यने ज्या यानागुलिं आः नेवाः संस्कार चले यायेत प्रशिक्षार्थीत हे सक्षम जूगु धयादिल । नेवाः देय् दबू प्रदेश नं. १ या संयोजक सोमबहादुर श्रेष्ठं आवंलि जन्मंनिसें मृत्यु तकया संस्कार नेवाः शैलीं यायेत व याकेत सकसितं इनाप यानादिल ।

ग्वसाः खलःया नायः विनोद चोच्छेँया सभापतित्वय् जूगु तालिम समापन ज्याझ्वलय् पुचःया सल्लाहकार विमला प्रधान, झीगु नेवाः समाज धनकुटाया अध्यक्ष सीताराम श्रेष्ठ, नेपाः बहुउद्देश्यीय सहकारी संस्थाया अध्यक्ष नारायणप्रसाद श्रेष्ठ, ज्याझ्वःया संयोजक अम्बिका श्रेष्ठ, भाषा प्रशिक्षक कृष्ण प्रजापति, प्रशिक्षार्थीपिं रामकुमार प्रधान, गौरव श्रेष्ठपिंसं नं नुगःखँ तयादीगु खः ।