भारतया निगः विमान कुर्कागु पाकिस्तानया दावी
भारतीय सीमा क्षेत्रय् पाकिस्तानया बमबारी
बिबिसी – पाकिस्तानी सेनां भारतया निगू लडाकु विमान कुर्कागु दावी याःगु दु । पाकिस्तानी सेनाया प्रवक्ता मेजर जनरल आसिफ गफूरं ट्विट यासें धाःगु दु कि पाकिस्तान वायु सेनां पाकिस्तानी एयर स्पेसय् दुहां वःगु निगः भारतीय लडाकु विमानयात कुर्कूगु दु ।
मेजर जनरल आसिफ गफूरं ट्विट याःगु दु, ‘थौं सुथय् पाकिस्तानी वायुसेनाया हमला लिपा लिसलय् भारतीय वायु सेनां भारत–पाक नियन्त्रण रेखा (एलओसी) पार यात ।
पाकिस्तानी वायुसेनां पाकिस्तानी एयरस्पेस दुने भारतया निगः विमानयात कुर्कूगु दु ।’‘छगू विमान आजाद जम्म काश्मिरय् कुतुं वंगु खःसा मेगु विमान भारत प्रशासित काश्मिरय् कुतुं वंगु खः । छम्ह भारतीय पाइलट नं गिरफ्तार याःगु दु ।’पाकिस्तानी सेनाया थ्व दावीया स्वतन्त्र पुष्टि धाःसा जूगु मदुनि ।
मेखे पाकिस्तानया विदेश मन्त्रालयया प्रवक्ता डा. मोहम्मद फैसलं धाःगु दु, ‘पाकिस्तानी वायुसेनां थःगु वायुसीमा दुने च्वनाः नियन्त्रण रेखाया मेखेपाखे बमबारी याःगु दु । तर थ्व भारतं याःगु स्ट्राइकया लिसलय् जूगु कारवाही धाःसा मखु ।’‘उकिं पाकिस्तानं गैरसैन्य लक्ष्ययात निशाना दयेकूगु दु ताकि मनूतय् ज्यान मवनेमा व कोलेट्रल ड्यामेज नं मजुइमा ।
थ्व आक्रमणया कारण आत्मरक्षा यायेगु थःपिनिगु अधिकार, इच्छाशक्ति व क्षमता न्ह्यब्वयेगु जक खः । जिमि थ्व ल्वापुयात तच्वयेकेगु इच्छा मदु, तर मजबूर यात धाःसा पूवंक तयार दु । थ्व हे कारणं जिमिसं थ्व स्ट्राइक ख्याच्वः बीगु ल्याखं न्हिनय् हे यानागु खः ।’
समाचार एजेन्सी पीटीआइ व रोयटर्सया कथं बालाकोट आक्रमण याःगु कन्हय् कुन्हु बुधवाः पाकिस्तानया विमान भारतीय वायु सीमा दुने दुहां वंगु खः ।
समाचार कथं पाकिस्तानी विमान जम्मु काश्मिरया राजौरी जिल्लाया नौशेरा सेक्टरय् दुहां वंगु खः । पीटिआईया कथं भारतया विमानं पाकिस्तानया विमानयात लिनाछ्वःगु खः ।मंगलवाः भारतं पाकिस्तानया बालकोटय् च्वंगु जैश ए मोहम्मदया क्याम्पय् थःगु हवाइ सेनां आक्रमण याःगु दावी याःगु खः । पाकिस्तानं धाःसा भारतया दावीयात खारेज यासें भारतीय विमान लाइन अफ कन्ट्रोल पार यानाः पाकिस्तानी सीमाय् दुहां वःगु खँ धयाच्वंगु खः ।
LEAVE YOUR COMMENTS