थँबहिलीइ साइकल जक चले यायेगु योजना

येँ- येँया पर्यटकीय लागा थँबहिलिइ आः साइकल जक चले जुइगु लँ (साइकल लेन) दयेकीगु जूगु दु । येँ महानगरपालिकां याकनं हे पर्यटकीय लागा थँबहिलिइ उकथं साइकल जक संचालन यायेकथं साइकल लेन दयेकेगु तयारी याःगु खः ।

येँ मनपाया भौतिक पूर्वाधार महाशाखा प्रमुख राम थापाया कथं आः तत्कालया निंतिं पर्यटकीय लागाय् उकथं साइकल लेन निर्माणया ज्या शुरु यायेगु व वयां लिपा आवश्यकताकथं मेमेगु थासय् नं उकियात विस्तार याना यंकेगु योजना दु ।

स्वनिगःया प्रमुख पर्यटकीय लागामध्ये दकलय् व्यस्तगु थाय्कथं कयातःगु थँबही लागा चाःहिउ वइपिं पर्यटकतय्त लक्षित यानाः येँ मनपां उकथंया योजना न्ह्यःने हःगु खः । नेपाः चाःहिउ वइपिं अप्वःथें पर्यटकत साइकलय् यात्रा यायेगु इच्छा याइगु खः । अज्याःपिं हे पर्यटकयात लक्षित यानाः उगु थासय् साइकल लेन निर्माण यायेगु योजना येँ मनपां न्ह्यःने हःगु खः ।

महाशाखा प्रमुख थापां स्वनिगलय् अप्वः सवारी साधनया चाप व उकिं अप्वयाच्वंगु वातावरण प्रदूषण नियन्त्रणया निंतिं नं थुकथंया व्यवस्था यायेमाःगु अति आवश्यक जूगु धयादी ।

येँ मनपां चालु आर्थिक दँय् जक साइकल लेन निर्माणया निंतिं छगू करोड बजेट विनियोजन याःगु दु । शुरुइ थँबहीयात साइकल लेन दयेके धुंकाः बजेटं मिले जूत्तले मेमेगु थाय् नं साइकल लेन दयेकेगु योजना न्ह्यःने हःगु येँ मनपां थ्व स्वयां न्ह्यः थँबही लागायात सवारी निषेधित क्षेत्र घोषणा याःगु खः । तर उकियात पूर्णरुपं कार्यान्वयनय् धाःसा हये फुगु मदुनि ।