नेपाली कम्पनीतय् निंतिं एबीबीया प्रविधि दिवस

येँ – प्रविधि ख्यलय् नेपालयात थीथी कथं योगदान बिया वयाच्वंगु एबीबी टेक्नोलोजिजं नेपाःया २५० गू कम्पनीतय् निंतिं प्रविधि दिवस न्यायेकूगु दु । उपभोगीय वस्तु, यातायात, भौतिक पूर्वाधार थेंज्याःगु उद्योगय् संलग्न नेपाली कम्पनीतय् निंतिं एबीबी थीथी कार्यशाला यायेगु लिसें न्हूगु प्रविधि प्रदर्शनी याःगु खः ।

अथेहे कार्यशालाय् सहभागी कम्पनीतय् दथुइ गोलमेच बैठक नं याःगु खः । विश्वय् हे पावर ग्रिड्स, इलेक्ट्रिफिकेसन प्रोडेक्टस, इन्डष्ट्रियल अटोमेसन एन्ड रोबोटिक्स एन्ड मोशनय् अग्रणी भूमिका म्हिताच्वंगु एबीबी १३० दँ पुलांगु प्रविधि कम्पनी खः । थ्व कम्पनीं नेपाःया मू मू जलविद्युत परियोजनाय् पावर व्यवस्थापन यायेगु लिसें हिमाली क्षेत्रय् सौर्य ऊर्जा क्षेत्रय् ज्या याना वयाच्वंगु दु ।

अथेहे ८० प्रतिशतं मल्याक पावर सबस्टेशनय् संचार सुविधाया प्रविधि स्थापना यायेगु ज्या थ्व कम्पनीं यायेधुंकूगु खँ धाःगु दु । अथेहे इन्टेलिजेन्ट पावर डिस्ट्रिब्युसन एण्ड म्यानेजमेन्ट टेक्नोलोजि मार्फत भवनयात स्मार्ट दयेकेगु ज्या नं एबीबीं याना वयाच्वंगु दु ।