ने. सं. ११४६ बछलागा पञ्चमी -

बेल्जियमयात बुकाः इटली सेमिफाइनलय्

येँ – विश्व नं. १ टिम बेल्जियमयात बुकाः इटली युरो कपया सेमिफाइनलय् दुहां वंगु दु । शुक्रवाः चान्हय् जूगु कासाय् इटलीं बेल्जियमयात २–१ गोलं बुकूगु खः ।
कासाया न्हापांगु हाफय् याःगु निगू गोल हे इटलीया विजयी गोल जुल । कासाया ३१ औं मिनेटय् निकोला बरेलां इटलीया न्हापांगु गोल याःगु खःसा थ्वयां १३ मिनेट लिपा लोरेन्जो इन्सिग्नें मेगु छगू गोल याःगु खः ।

न्हापांगु हाफया इन्जुरी इलय् बेल्जियमया निंतिं रोमेलु लुकाकु पेनाल्टिपाखें गोल याःगु खः । जेरिमि डोकुयात गोभान्नी डि लोरेन्जों बक्सय् क्वःदयेकेवं पेनाल्टिया ह्वःताः वःगु खः ।

इटलीं आः सेमिफाइनलय् स्पेनलिसे म्हिती । स्पेन थ्वयां न्ह्यः जूगु कासाय् स्वीट्जरल्यान्डयात पेनाल्टि सुटआउट ३–१ गोलं बुकाः सेमिफाइनलय् थ्यंगु खः ।