ने. सं. ११४४ ञलाथ्व दशमी -

मच्छिन्द्र शीर्षथासय् थ्रीस्टार नं त्यात

येँ- मच्छिन्द्र क्लब जारी शहीद स्मारक ए डिभिजन लिगया शीर्षथासय् थहां वंगु दु । शनिवाः जूगु कासाय् एपिएफ क्लबयात २–१ गोलं बुकुसें मच्छिन्द्र शीर्षथासय् थहां वंगु खः । म्हिगः हे जूगु मेगु कासाय् सञ्जोक राईया ह्याट्रिकया ग्वाहािलं थ्रीस्टार क्लबं सरस्वती युथ क्लबयात ४–० गोलं बुकल ।

एपिएफ विरुद्धया म्हिगःया कासाय् मच्छिन्द्र न्हापांगु हाफय् छगू गोलं लिउने लाःगु खः । कासाया ४३ औं मिनेटय् रमेश दंगालं हेडपाखें गोल यासें एपिएफयात अग्रता बिउगु खः । नवीन लामां थ्वाःगु फ्रिकिकय् दंगालं हेड यासें गोल याःगु खः । न्हापांगु हाफय् छगू गोलं लिउने लाःसां लिपांगु हाफय् मच्छिन्द्र पुनरागमन यासें कासा थःगु पक्षय् लाकल ।

निगूगु हाफय् सुरु जुइवं हे मच्छिन्द्रया निंतिं विशाल राई बीं बराबरीया गोल यानाबिउगु खः । रञ्जित धिमालं थ्वाःगु कर्नरय् राईं हेडपाखें गोल याःगु खः । कासाया ८० ओं मिनेटय् मछिन्द्रया निंतिं रञ्जित धिमालं विजयी गोल यानाबिउगु खः । धिमालं थ्वाःगु पेनाल्टियात एपिएफया गोलकिपरं बचे याःगु खःसां रिबाउन्डय् वःगु बलय् धिमालं हे गोल यानाबिउगु खः । मच्छिन्द्रया पिटर सेगनुयात बक्सय् क्वःदयेकेवं मच्छिन्द्रयात पेनाल्टि वःगु खः ।

थ्व विजय लिपा मच्छिन्द्र २२ अंक सहित ल्याः धलखय् शीर्ष थासय् थ्यंगु दु । थ्व निगूगु थासय् लानाच्वंगु आर्मी क्लब स्वयां २ अंकं जक अप्वः खः । तर आर्मीं धाःसा मच्छिन्द्र स्वयां छगू कासा म्हो म्हितूगु दु ।

मेखे थ्वयां न्ह्यव जूगु मेगु कासाय् लिपांगु हाफय् जक प्यंगू गोल यासें थ्रीस्टारं शानदार जीत चूलाकूगु खः । न्हापांगु हाफय् नं थ्रीस्टारं सरस्वतीयात दबाबय् तयातःगु खः, तर गोल धाःसा याये मफयेवं प्रशिक्षक मेघराज केसीं निम्ह कासामि हिउगु खः । थ्व लिपा लिपांगु हाफ सुरु जूगु स्वंगू मिनेट लिपा हे लालरमावियां थ्रीस्टारया निंतिं न्हापांगु गोल यातसा कासाया ५७ औं मिनेटय् सन्जोक राईं थःगु न्हापांगु गोल यात । थ्व लिपा राई कासाया ६० औं मिनेट व ७१ औं मिनेटय् थप निगू गोल यात । थुकिया लिसें राई जारी लिगय् ह्याट्रिक याःम्ह न्हापांम्ह कासामि नं जूगु खः ।
थ्व वि जय लिपा थ्रीस्टार १७ अंक सहित प्यंगूगु थासय् थ्यंगु दुसा सरस्वती धाःसा ४ अंक कयाः दकलय् लिउने लाःवंगु दु ।