मिसा आयोग गन बेपत्ता ?

येँ – संविधान कथं सरकारं न्हून्हूगु आयोगत गठन यानाः उकिया पदाधिकारीत नं धमाधम नियुक्त याना यंकूसां महिला आयोग छगुली धाःसा छाय् आः तक पदाधिकारी नियुक्त मयाःगु धइगु न्ह्यसः मिसा अधिकारकर्मीतय्सं तया हःगु दु । महिला आयोगय् पदाधिकारी खाली जूगु हे प्यदँ दयेधुंकल । तर सरकारं आः तक पदाधिकारी नियुक्त याःगु मदुनि ।

आयोगय् छम्ह अध्यक्ष व न्याम्ह दुजः दइ । थौंकन्हय् सुं हे मदयाः छम्ह सचिवया भरय् आयोग चले जुयाच्वंगु दु । पदाधिकारी मदुगु कारणं यानाः आयोगय् दर्ता याये हःगु मिसा हिंसा सम्बन्धी द्वलंद्वः उजुरीत अध्ययन तकं याये मखंक थानाच्वंगु दु । अथे हे देशय् निर्मला पन्त लगायत मिसा मस्तय्त बलात्कार यानाः स्यायेगु थेंज्याःगु आपालं घटनात जूसां आयोग केवल स्वया जक च्वनेत बाध्य जूगु खँ धाःगु दु ।

यदि आयोगय् पदाधिकारी दुगु जूसा थज्याःगु आपालं मुद्दाय् सः तयाः अपराधीयात ज्वनेत ग्वाहालि जू वनीगु बिचाः नं मिसा अधिकारकर्मीतय्सं तया हःगु दु । देशय् मिसा मस्तय् विरुद्ध तच्वःगु हिंसा जुयाच्वंगु इलय् तकं महिला आयोग मौन जुयाच्वंगुयात मिसा अधिकारवादीतय्सं मिस्तय्त स्वयेगु सरकारी दृष्टिकोणयात द्वपं बिया हःगु दु ।

स्वंगू दर्जन कर्मचारी दुगु थ्व आयोगयात सरकारं दँय् ५० लाख तकाया बजेट बियातःगु दु । पदाधिकारी मदयाः मिसातय्त जुइगु छुं नं कथंया उजुरीया लागिं सुनुवाई याइगु व थासय् वनाः सः तइगु निकाय तकं मदयाच्वंगु दु । सरकारं भाषा आयोगय् नं निम्ह दुजः तयाः मेपिं आः तक छ्वःगु मदुनि ।