स्वयम्भूइ निर्माण दिकेत वडाया पौ

येँ – येँ मनपा १५ वडा ज्याकुथिं स्वयम्भू क्षेत्रय् अनया गरिमा ल्यंका तयेत व न्हूगु संरचना दयेकेत स्वीकृत मबीगु लागिं पुरातत्व विभागयात पौ च्वःगु दु । पतिइ उगु क्षेत्रय् छुं नं संरचना दयेकेमाःगु खःसा वडा ज्याकूलिसे समन्वय व सिफारिस यानाः जक प्रक्रिया न्ह्याकेत नं धयातःगु दु ।

१५ वडाया अध्यक्ष लिसें येँमनपाया प्रवक्ता ईश्वरमान डंगोलया कथं स्वयम्भू महाचैत्व वनेगु पूर्वया त्वाथलय् थौंकन्हय् आधुनिक निर्माण सामग्री छ्यलाः ध्वाखा दयेकेगु ज्या जूगुलिं थुकिं यानाः स्वयम्भूया मौलिक संरचनाया बारेहे न्ह्यसः ब्वलंगुलिं पौ च्वयागु खँ धयादीगु दु ।
आधुनिक निर्माण सामग्री छ्यःगु सुचं वयेधुंकाः निर्माण पक्षयात वैशाख ३० निसें निर्माण ज्या रोक्का यानाः निर्माण सम्बन्धी जानकारी महानगरया केन्द्रीय कार्यालय छ्वःगु खः ।

नियमनकारी निकास सुयां लिसे नं समन्वय मयासे आधुनिक निर्माण सामग्री छ्यलाः संरचना दयेकाच्वंगु ज्या प्रक्रिया अःखः जूगुलिं रोक्का यानागु खँ प्रवक्ता डंगोलं कनादीगु दु । तःभुखाचं स्वयम्भू क्षेत्रय् क्षति जूगु झिंच्यागू सम्पदा मध्ये झिंन्यागू सम्पदा पुनर्निर्माण जुइधुंकूगु दु ।

 

सम्बन्धित बुखँ

LEAVE YOUR COMMENTS