गुथि न्हंका छ्वयेत गुथिया न्हूगु विधेयक

येँ – सरकारं संसदय् दर्ता याःगु गुथि सम्बन्धी ऐन संशोधन यायेत दयेकूगु विधेयक २०७५ यात कयाः सरोकारवालातय्सं असन्तुष्टी प्वंकूगु दु । विधेयकं देशय् न्हापांनिसें न्ह्याना वयाच्वंगु गुथि परम्परा व धर्म संस्कृति ध्वस्त याइ धासें सम्बद्ध मनूतय्सं विरोध प्वंकूगु खः ।थ्व विधेयक कार्यान्वयन जुइवं आः दुगु गुथि संस्थान खारेज जुयाः उकिया थासय् प्राधिकरण वइ ।

प्राधिकरण वयेवं थीथी देगः, जात्रा, पर्व व अज्याःगु जात्रा पर्व सञ्चालन यायेत तयातःगु छुं नं कथंया जग्गा वा छेँलिसे पुलांपिं गुथियारतय्गु छुं नं कथंया स्वापू दइ मखु । अज्याःगु फुक्क ज्या प्राधिकरणं हे याइ धकाः विधेयकय् च्वयातःगु दु ।

उलि जक मखु, गुथि संस्थान गठन जुइधुंकाः सरकारं कब्जा यानातःगु थीथी गुथिया जग्गा लिपा वानाः गुलि नं गायब जूगु खः, आः उकियात मालेगु ज्या मयासे हाल गुलि जग्गा ल्यं दुगु खः प्राधिकरणया रजिष्टरय् उलि हे कायम जुइ धकाः नं उकी च्वयातःगु दु । थ्व धइगु गुथि संस्थानया कर्मचारीतय्सं भूमाफियातलिसे मिले जुयाः गुलि नं जग्गा हड्पे याःगु खः, उकियात वैधता बीगु ज्या खः धकाः धाःगु दु ।

विधेयकया थ्वहे खँयात कयाः थौंकन्हय् गुथिलिसे सरोकार दुपिं मनूतय् दथुइ थीथी थासय् थीथी कथंया मुँज्या व सहलहया ज्या जुयाच्वंगु दु । थ्वहे झ्वलय् म्हीग येँया द्वारिका होटलय् नेपाल गुथि संरक्षण पुचलं नं छगू ज्याझ्वः ग्वसाः ग्वःगु दु । उगु ज्याझ्वलय् डा. केदारभक्त माथेमा, डा. गोविन्द टण्डन आदिपिंसं विधेयकयात छुं नं हालतय् गथे खः अथे पारित याके मजिउगु बारे बिचाः तयादीगु खः ।