लक्ष्मीनारायण पुनमाया सिरपाः लःल्हात

येँ – ३ नं. प्रदेशया नामय् नेवाः म्हसीका दयेमाःगु खँय् प्रमुख स्वंगू राजनीतिक दलया नेवाः नेतात छप्वाः हे म्हुतु जूगु दु । म्हीग थनया जगतसुन्दर ब्वनेकुथिइ जूगु छगू ज्याझ्वलय् नेकपा (माओवादी केन्द्र)या नेता दिलीप महर्जन, नेपाली कांग्रेसया नेता तीर्थराम डंगोल व नेकपा (एमाले)पाखें येँ क्षेत्र नं. ८ पाखें प्रदेशसभायाया सभासद जुयादीम्ह राजेश शाक्यपिंसं थुकथंया विचाः तयादीगु खः ।शिक्षासेवी नापं पुलांम्ह सांसद लक्ष्मीदास मानन्धरं थः मांअबुया नामं एसइइ परीक्षाय् नेपालभाषा विषय कयाः दकलय् अप्वः ल्याः हःम्ह विद्यार्थीयात बीगु ल्याखं नीस्वनादीगु लक्ष्मीनारायण पुनमाया सिरपाः लःल्हायेत ग्वसाः ग्वःगु उगु ज्याझ्वलय् भाजु मानन्धरलिसें साहित्यकार व शिक्षाविद् भाजु हितकरवीर सिं कंसकारं नं नेपालभाषा व नेवाः जातियात थकायेगु खँय् बः बियाः नवानादीगु खः ।

ज्याझ्वःया मूपाहां वाङ्मय शताब्दी पुरुष सत्यमोहन जोशीं थुगुसी एसइइ जांचय् नेपालभाषाय् दकलय् अप्वः ल्याः हयादीम्ह शान्तिनिकुञ्ज मा.वि.या विद्यार्थी सचिन कारंजितयात तक्मा व हनापौ लःल्हानादीगु खःसा सिरपाःया दाता मानन्धरं नीन्याद्वःतका लःल्हानादीगु खः । अथे हे नेपालभाषा विषय कयाः पास जूपिं मेपिं झिंखुम्ह विद्यार्थीतय्त नं म्हतिं द्वःछि द्वःछि तका दां व दसिपौ लःल्हाःगु खः । ग्वसाः खलःया नायः प्रा. डा. चुन्दा वज्राचार्यया सभापतित्वय् जूगु ज्याझ्वलय् जगतसुन्दर ब्वनेकुथिया प्रिन्सिपल सुनिता मानन्धरं लसकुस न्वचु बियादीगु खः ।

सम्बन्धित बुखँ

LEAVE YOUR COMMENTS