विस्फोटया विरोधय् म्यानपावर कम्पनी बन्द

येँ – वैदेशिक रोजगार व्यवसायी संघया अध्यक्ष रोहन गुरुङ्गया छेँय् बम विस्फोट जूगु विरोधय् आइतवाः म्यानपावर कम्पनीतय्सं थःपिनि ज्याकू बन्द याःगु दु । गुरुङ्गया येँ बसुन्धाराय् च्वंगु छेँय् बम विस्फोट जूबलय् प्यम्ह घाःपाः जूगु खःसा छेँय् पार्किङ्ग यानातःगु छगः गाडी बांमलाक क्षति जूगु खः ।

वैदेशिक रोजगार व्यवसायीतय्सं अध्यक्षया छेँय् हे विस्फोट जूगु घटनां थःपिं नं असुरक्षित जूगु महसुस याना धासें विरोध प्वंकूगु खः । थ्व विस्फोट नेकपा विप्लवया कार्यकर्तातय्सं याकूगु खः । विप्लवं विस्फोटया जिम्मा नं कायेधुंकूगु दु । चन्दा मबिउगुलिं थ्व विस्फोट याकूगु धासें व्यवसायीतय्सं थःपिनिगु सुरक्षा यायेमाःगु माग याःगु दु ।

अथेहे संघं दोषीयात कडा कारवाही यायेत माग यासें चन्दा आतंकविरुद्ध रणनीति दयेकेगु खँ नं धाःगु दु । विप्लव समूहपाखें स्वला न्ह्यव अध्यक्ष गुरुङ्गयाथाय् चन्दा फ्वंवंगु खः । तर गुरुङ्ग फ्वंवःकथं चन्दा मबिउगुलिंं थ्व विस्फोट याकूगु खँ धाःगु दु । विप्लव समूह चन्दा मबिउगु हे कारणं छुं न्हि न्ह्यव नख्खुइ च्वंगु एनसेलया ज्याकुथिइ नं बम मुइकूगु खः । थ्व घटनाय् छम्ह लँजुवाः सीगु खःसा मेपिं स्वम्हु घाःपाः जूगु खः ।