ने. सं. ११४४ कौलाथ्व तृतीया -

कोशी आन्दोलनकारीतय् लगत प्रहरीं मुंकाच्वन

येँ (नेपालभाषा टाइम्स)- प्रदेश नं. १ या नां ‘कोशी प्रदेश’ तःगु विरुद्ध आन्दोलन यानाच्वंपिं अभियन्तातय्गु नां व विवरण प्रहरी प्रशासनं संकलन यानाच्वंगु द्वपं लाःगु दु । प्रहरीं उगु आन्दोलनय् सक्रिय जुयाच्वंपिं नेता व सामान्य कार्यकर्तातय्गु तकं नां, व्यक्तिगत विवरण व फोटो समेत संकलन यानाच्वंगु खँयात आन्दोलनकारीतय्सं विरोध याःगु दु । वंगु छुं ई न्ह्यवंनिसें प्रहरी प्रशासनं आन्दोलनकारीतय्गु लगत कायेगु ज्या न्ह्याकूगु खः ।

थ्वहे झ्वलय् थ्व आन्दोलनया नेतृत्व यानाच्वंगु ‘प्रदेश नं. १ पुनः नामांकन संयुक्त संघर्ष समिति’ पाखें छगू वक्तव्य पित बिसें आन्दोलनकारीतय्गु नां मुंकेगु थ्व ज्याया विरोध याःगु दु । प्रशासनं आन्दोलनं दमन यायेगु नियतं अथे नां मुंकाच्वंगु खः धासें समितिं थ्व ज्या तुरुन्त दिकेत नं इनाप याःगु दु ।

समितिं जारी याःगु वक्तव्यय् प्रहरी प्रशासनं थौंकन्हय् कोशी विरोधी आन्दोलनकारीतय्सं ल्वाभः सहित तालिम बीगु ज्या यानाच्वन धकाः प्रचार यासें आन्दोलनयात हतियार हे छ्यलाः दमन यायेगु षडयन्त्र शुरु याःगु खँ नं धाःगु दु ।

आन्दोलनकारीतय्सं थःपिनि आन्दोलन शान्तिपूर्ण रुपं हे न्ह्यानाच्वंगु दु धासें यदि थुकियात दमन यायेगु हे नियत ज्वन धाःसा थ्व अशान्तिया लँपुइ नं वनेफुगु व उकिया दोषी सरकार थः हे जुइ धकाः नं ख्याच्वः बिउगु दु ।

प्रहरीया नं लगत काइगु ?
थ्वहे झ्वलय् कोशी नामाकरण विरोधी आन्दोलनकारीतय्सं यदि प्रहरीं थःपिनि नां संकलन याः वल धाःसा अथे नां संकलन याइपिं प्रहरीतय्गु नां नं थःपिंसं संकलन यायेमाःगु खँ धयाहःगु दु । उमिसं सामाजिक सञ्जालय् थज्याःगु बिचाः पोष्ट यासें गोप्य रुपं नां मुंकीपिं प्रहरीत म्हसीकाः उमिगु नं नां मुंकेगु ज्या यायेमाः धयाहःगु खः ।
प्रहरीपाखें आन्दोलनकारीया नां मुंकाच्वंगु थ्व ज्यायात आन्दोलनया समर्थकतय्सं सामाजिक सञ्जालय् नं कडा रुपं विरोध यानाः बिचाःत पोष्ट यानाच्वंगु दु ।