नेपाःया कला संस्कृति ज्वना वंपिं चित्रकार

नेपाःया कला संस्कृतिया बारे अध्ययन भ्रमण यायेत वःपिं भारतीय कलाकार (चित्रकार) स्वनिगःया ऐतिहासिक, सांस्कृतिक, धार्मिक महत्वया कला संस्कृति ज्वनाः लिहां वंगु दु । छवाःयंकंया नेपाः भ्रमणय् वःपिं भारतीय इमिसं स्वनिगःया पहिचानया रुपय् दयाच्वंगु स्वयम्भू, पशुपति, येँ लाय्कू, यल लाय्कू, ख्वप, थिमि व नगरकोटया महत्वपूर्ण दृष्य क्यान्भासय् कियाः लिहां वंगु खः ।

भारतीय झिंन्याम्ह चित्रकारया नेतृत्व यानाः नेपाः झायादीम्ह महाराष्ट्रया अब्बल चित्रकार कडलया हिरेमठं स्वनिगःया पुरातात्विक महत्वया कलाकौशलं बिस्कंकथंया अनुभूति बिउगु खँ न्ह्यथँसें उकियात क्यान्भासय् कियाः यंकागु दु धयादिल । नेपाःया यात्रा चित्रात्मक रुपं अतिकं उत्कृष्ट जूगु खँ न्ह्यथँसे वय्कलं थनया प्यागोडा व शिखरशैलीया पुरातात्विक संरचनां थःपिनिगु मन लोभी जूगु खँ न्ह्यथनादिल ।

भारतीय कलाकारतय् पुचः लिहां वनेधुंकूगु दु । नेपालय् च्वनाच्वंगु भारतीय चित्रकारयात अन्तर्राष्ट्रिय जलरंग समाज (आइडब्लुएस) नेपालं समन्वय याःगु खः । नेपालय् स्वयागु व खनागु दृष्यत भारतय् वनाः नं क्यान्भासय् उकियात कियाच्वनेगु चित्रकारं धाःगु दु ।

भारतीय चित्रकारं नेपाःया कला व संस्कृति स्वयां अतिकं न्ह्यइपु तायेकूगु धासें समाजया अध्यक्ष एनबी गुरुंगं धयादिल, ‘आः इपिं नापं च्वनाः दयेकागु चित्रत निगुलिं देशय् वृहत प्रदर्शनी यायेगु योजना दयेकागु दु, थ्व न्याला–खुलाया हे दुने जुइ ।’ भारतीय चित्रकारतय् संस्था ‘संस्कार भारती’पाखें चित्रकला अध्ययनया निंतिं वःपिं भारतीय चित्रकारं जलरंगमार्फन दृष्यत क्यान्भासय् किउगु खः ।

ललितकलाया माध्यमं भारतय् उगु पुचलं हरेक वालय् चित्रकला .कार्यशाला (कक्षा) संचालन याना वयाच्वंगु दु । भारतय् जक अभियान न्ह्याकाच्वंपिं चित्रकार अन्तर्राष्ट्रिय जलरंग समाज, नेपालया समन्वयय् न्हापांखुसी नेपाः वःगु खः । इमित नेपाःया चित्रकारतय्सं नं क्यान्भासय् जलरंग जायेकाः ग्वाहालि याःगु खः ।

पुरातात्विक महत्वलिसें थिमिया मौलिक संस्कृति, रहनसहन व देगः, फल्चा, सतःयात भारतीय चित्रकारं तसकं ययेकूगु समाजया महासचिव दीपेन्द्रमान बनेपालीं कनादिल ।‘थिमिया गल्ली गल्ली चाःहिका, हरेक थाय् इमिगु निंतिं न्हूगु जुयाबिल, छु खन उकी हे इपिं आकर्षित जुल, थन तक कि किपा तकं कयाः यंकूगुलिं इमिसं थःगु देशय् वनाः नं चित्र च्वयाः नेपाःया संस्कृति बारे प्रचार याइगु खँय् विश्वस्त जुयाच्वना’ बनेपालीं कनादिल ।

निगू देय्या दथुइ चित्रकारतय् थुकथं चित्रकला कार्यशाला जुइबलय् थवंथवय् संस्कृतिया कालबिल जुइगु व सम्बन्ध नं क्वातुया वनीगु कलाकारतय् धापू दु । नेपाःया प्यागोडाशैली व शिखरशैलीया संरचना विश्वया निंतिं हे आकर्षक जू । थज्याःगु संरचना लिच्छवीकलीननिसेंया खः । नेपालं नं नेपाली शैली भारतय् वंगु दु ।

भारतपाखें नं मिथिलाञल क्षेत्रय् संरचना दुहां वःगुलिं निगू देय्या भौगोलिक व राजनीतिक जक मखसे कलाया नं सम्बन्ध दया वयाच्वंगु धायेगु याः । भारतीय चित्रकार विक्रान्त सिटोले व फारुख नगाफालं नेपाःया कला कौशल चित्रय् किया यंकेबलय् भारतय् तकं चित्रपाखें नेपाःया प्रचारप्रसार जुइगुलिं पर्यटन प्रवद्र्धनय् ग्वाहालि जुइ धयादिल ।

भारतया प्रफुल्ल सावन्तं नेपाःया दृष्यं आकर्षित याःगु धासें छगू हे थासय् च्वनाः नं लछितक चित्र च्वया च्वने फइगु आपालं विषय दुगु खँ न्ह्यथनादिल । थज्याःगु ज्याझ्वललं निगू देय्या सम्बन्धयात विकास यायेगु नापं पर्यटन प्रवद्र्धनय् तकं तिबः बीगु जूगुलिं नेपाल ललितकला प्रज्ञा प्रतिष्ठानं नं मंकाः ज्याझ्वः यायेगु योजना दयेकूगु कुलपति कान्छाकुमार कर्माचार्यं कनादिल ।

 

सम्बन्धित बुखँ

LEAVE YOUR COMMENTS