तिबः संकिपाया शुभमुहूर्त
येँ(नेपालभाषा टाइम्स)- नेपालभाषाया न्हूगु संकिपा ‘तिबः’या वंगु शनिवाः छगू ज्याझ्वःया दथुइ शुभमुहूर्त याःगु दु । थनया खुसिबुँ च्वंगु काठमाडौं नेवाः किन्डरगार्टेनय् जूगु छगू ज्याझ्वःया दथुइ संकिपाया शुभमुहूर्त याःगु खः ।
संकिपाया निर्मातालिसें म्येँ हालामि सरजु रंजितया सभापतित्वय् जूगु ज्याझ्वलय् मेम्ह निर्माता समिता रंजित श्रेष्ठं लसकुस यानादीगु खः । शुभमुहूर्त ज्याझ्वलय् संकिपाया निर्माता रंजितं नैंक्याः तछ्यानादीगु खःसा मेम्ह निर्माण श्रेष्ठं क्ल्याप बियादीगु खः ।
नेपालभाषाया ऐतिहासिक संकिपा ‘जामनः गुभाजु’ निर्माण याःगु वाइल्ड बुल्स प्रोडक्सनलिसे जानाः दयेकेत्यंगु संकिपा सामाजिक परिवेशया बाखंया लिधंसाय् निर्माण जुइगु निर्देशक रवि साय्मिं कनादिल । संकिपाया बाखं ओमशंकर श्रेष्ठं च्वयादीगु खःसा वय्कःलिसें सुशील राजोपाध्याय व निर्देशक साय्मिं पटकथा च्वयादीगु दु ।
संकिपाय् सुशील राजोपाध्याय, आशाकाजि थकू, संघरत्न शाक्य ,पुष्कर माथेमा, कृष्णभक्त महर्जन, सरस्वती मानन्धर, सुनिता ठाकुर, ओमशंकर श्रेष्ठ, बिज्ञान पक्का, मनोज महर्जन, हसना महर्जनलिसें मेपिं आपालं कलाकारया अभिनय यानादी ।
संकिपाया छायाँकन अमर चित्रकार व सुविना चित्रकारं यानादीगु जूगु दुसा रुसिल अमात्य सहायकया रुपय् ग्वाहालि यानादी । संकिपाया म्येँ राजेन्द्र महर्जन ,ओम शंकर श्रेष्ठ व सुसिल राजोपाध्यायं च्वयादीगु दुसा भूपेन्द्र वज्राचार्य व शिव शाहीया संगीत दइगु ज्याझ्वलय् जानकारी बिउगु दु ।
LEAVE YOUR COMMENTS