माघंनिसें नमूना जनगणना
येँ – केन्द्रीय तथ्यांक विभागं निदँ लिपा जुइगु राष्ट्रिय जनगणनाया निंतिं नमूना जनगणनाया तयारी याःगु दु । विभागं २०७८ सालय् जनगणना कायेत्यंगु दुसा उकिया निंतिं वइगु माघ १ गतेनिसें स्वलायंकं नमूना जनगणनाया तयारी याःगु खः ।
विभागं छगू पत्रकार सम्मेलन यासें नमूना जनगणनाया निंतिं सुपरीवेक्षक, गणक व मेमेगु आवश्यक जनशक्ति यानाः १२२ म्ह परिचालन यायेगु जानकारी बिउगु दु । विभागं बिउगु जानकारीकथं नमूना जनगणनाया निंतिं १५ म्ह सुपरीवेक्षक, ख्वीम्ह गणक व मेपिं पीन्हय्म्ह यानाः १२२ म्ह जनशक्ति परिचालन यायेत्यंगु दु ।
राष्ट्रिय योजना आयोग मातहतया न्हय्गुलिं प्रदेश, हिमाल, तराई व पहाडया जनसंख्याया समानुपातिक प्रतिनिधित्व जुइकथं करिब ११,६१० खा छेँ–परिवारय् नमूना जनजणना संचालन यायेत्यंगु खः । नमूना जनगणनाया निंतिं सुपरीवेक्षक व गणकयात करारय् नियुक्त यायेगु नं विभागं जानकारी बिउगु दु ।
प्रत्येक प्रदेशपाखें निगू जिल्लाया ल्याखं झिंप्यंगू जिल्लाया ५५ गू वडाय् संचालन जुइगु नमूना जनगणनाया निंतिं विभागं छगू करोड १७ गू लाख बजेट नं विनियोजन याःगु दु । विभागया महानिर्देशक नेबिनलाल श्रेष्ठया कथं खुला स्वयां अप्वः अस्थायी रुपय् च्वनाच्वंपिं नागरिकया हकय् उगु हे थासं गणना यायेगु जुइ धासें विदेशय् च्वनाच्वंपिं नेपाःमिया हकय् धाःसा जनगणना चुनौतिपूर्ण जुइ फइगु वय्कलं धयादिल ।
विभागं निदँ लिपा जुइगु जनगणनाया निंतिं क्वःछिनातःगु ‘जिगु गणना, जिगु सहभागिता’ धइगु नारा व जनगणनाया निंतिं लोगो नं सार्वजनिक याःगु खः । महानिर्देशक श्रेष्ठं जनगणनाया प्रारम्भिक लिच्वः स्वलाया दुने व पूर्ण प्रतिवेदन गुलाया दुने सार्वजनिक यायेगु नं जानकारी बियादिल ।
नमूना जनगणनाया निंतिं आयोगया दुजः डा. रामकुमार फुँयालया संयोजकत्वय् छगू समनवय समिति नं गठन याःगु दुसा जनगणनाया निंतिं चालु आर्थिक दँय् ३५ गू करोड २७ गू लाख विनियोजन याःगु दु ।
नेपालय् औपचारिक रुपय् वि.सं. १९९१ सालय् जनगणना यायेगु ज्या न्ह्याःगु खःसा वयां लिपा विभागं प्रत्येक झिदँय् छक्वः जनगणना यायेगु याना वयाच्वंगु दु । लिपांगु इलय् वि.सं. २०६८ सालय् जनगणना याःगु खः ।
LEAVE YOUR COMMENTS