मेलम्ची : ठेक्का भंग निश्चित, लः वइगु अनिश्चित

येँ – सरकारं मेलम्ची खानेपानी आयोजनाया ठेकेदार सीएमसी लिसेया ठेक्का तोडे याइगु जूगु दु । शुक्रवाः च्वंगु आयोजनाया बोर्ड बैठकं उगु ठेक्का तोडे यायेगु निर्णय याःगु खः । बोर्ड निर्णय लिपा औपचारिक रुपं सुचं पिथनाः ठेक्का तोडे यायेगु तयारी याःगु खँ सीदुगु दु । सरकारं सीएमसीयात ठेक्का तोडे यानागु जानकारी बीत ‘टर्मिनेसन लेटर’ नं छ्वयेगु तयारी याःगु दु ।

सीएमसी वित्तीय संकटय् लायेवं ठेकेदार कम्पनीया कर्मचारीत ज्या त्वःताः थःगु देशय् बिसिउँ वनेत स्वःगु खःसा सरकारं प्रहरीया ग्वाहालिं उमित ज्वनाः पासपोर्ट जफत याःगु खः । वयां लिपा इटालियन राजदूतावासया ग्वाहालिइ क्रिशमस व न्हूदँ हनाः ज्याय् लिहां वयेगु धकाः उपिं वंगु खः । ठेकेदार कम्पनी सीएमसीलिसे जूगु औपचारिक संवादया झ्वलय् सीएमसीं आयोजनाया ज्याकुथी लिहां मवयेगु स्पष्ट यायेवं बोर्डं उगु निर्णय याःगु खः । ठेक्का तोडे यानागु सुचं याकनं हे पिकायेगु तयारी नं आयोजनां यानाच्वंगु दु । सूचं पिथनागु निवाःया दुने ठेकेदार कम्पनी ज्याय् लिहां मवल धाःसा स्वतः ठेक्का प्रक्रिया भंग जुइगु खँ आयोजानां धाःगु दु ।

सीएमसीं आयोजना न्ह्यःने न्ह्याकेगु बारे सहलह यायेगु निंतिं प्रमुख कार्यकारी अधिकृत (सीईओ) पाउलो पोर्सेलीया नेतृत्वय् छगू पुचः नेपाः वयेगु धाःसां नं आः तक वइगु छाँटकाँट मदुगुलिं ठेक्का सम्झौता भंग यायेगु लँपुइ आयोजना वंगु खः । सरकारं ठेक्का रद्द यायेगु लिसें सीएमसीं धरौटी वापत नेपाःया थीथी बैंकय् तयातःगु २ अर्ब तका ध्यबा नं जफत यायेगु तयारी यानाच्वंगु दु ।

आयोजनाया स्रोतं धाःकथं ठेक्का सम्झौता भंग जुइधुंकाः आः ल्यं दनिगु ज्या पूवंकेगु लागिं गुकथं न्ह्याः वनेगु धइगु बारे धाःसा बोर्डं छुं निर्णय याःगु मदुनि । न्हापा ठेक्क भंग यानाः जक मेगु निर्णय यायेगु कथं बोर्डं तयारी यानाच्वंगु खँ सीदुगु दु । ठेक्का भंग जुल कि आः लत्याया दुन हे मेलम्चीया लः येँये वइ धकाः सरकारं धयाच्वंगु खँ नं पूमवनीगु निश्चित जूगु दु । अथे खःसां आयोजनां धाःसा लत्याया दुने न्ह्याथे यानाः नं लः हयेगु जुइ धायेगु यानाच्वंगु दु ।

अथेहे सीएमसीया नेपाली ठेकेदारपिंसं नं न्हापा फुक्कं ध्यबा भुक्तानी मजुल धाःसा ज्याय् लिहांमवयेगु धकाः अडान कयाच्वंगु दु । उमिसं सीएमसीं थःपिंत बी ल्यं दनिगु ध्यबा सरकारं बीमाःगु माग याना वयाच्वंगु दु ।

सम्बन्धित बुखँ

LEAVE YOUR COMMENTS