‘सुव्यवस्थित, भ्रष्टाचारमुक्त नगरपालिका दयेकेगु जिगु मू प्राथमिकता खः’

वइगु मंसिर १६ गते जुइत्यंगु स्थानीय तहया उपचुनावय् किपू नगरपालिकाया मेयर पदय् माओवादी केन्द्रपाखें प्रा.डा. शिवशरण महर्जनं उम्मेदवारी बियादीगु दु । थुगु चुनावय् वय्कःया मुद्दा, त्याइगु आधार, त्याइगु सम्भावना आदि बारे नेपालभाषा टाइम्सया निंतिं तेजनारायण महर्जनं यानादीगु खँल्हाबल्हाया सारसंक्षेप

छिगु उम्मेदवारी छाय् ?
जि त्रिभुवन विश्वविद्यालयय् स्वीन्हय्दँ प्राध्यापन याना वयाम्ह खः । अले किपूया थीथी ख्यलय् ज्या यायेगु झ्वलय् नेतृत्वदायी भूमिका म्हिता वयाच्वनागु दु । सामाजिक अभियन्ता कथं नागरिक समाज, मानव अधिकारया निंतिं नं ज्या याना वयाच्वनागु खः । थथे थीथी ख्यलय् ज्या याना वयाच्वनागु खःसां थःम्हं धयाथे, थःत चित्त बुझे जुइकथं ज्या याये खंगु मदु । थःम्हं धयाथे ज्या यायेगु निंतिं पद हे माःगु जुल । थःहे पद दुगु जूसा फुक्कं ज्या याये खनीगु, मेपिंसं ज्या हे याके मबिइगु जुयाच्वन । थः हे पदय् वल धाःसा यक्व सामाजिक ज्या याये खनीगु, जनताया ज्या याये खनीगु तायेकाः थुगुसी जिं नं उम्मेदवारी बियागु खः ।

छिगु मू मुद्दा छु खः ?
आःयागु जिगु मू मुद्दा धयागु किपू नगरपालिकाय् सुव्यवस्था कायम यायेगु, सुशासन कायम यायेगु, भ्रष्टाचार मुक्त यायेगु, अले किपूयात रुपान्तरण यायेगु खः । किपूया जनतायात एकदम सुलभ ढंगं सेवा बीगु, इलय् सेवा बीगु जिगु ज्या जुइ ।

किपुली आःया समस्या छु खंकादिया ?
किपूया समस्या धयागु ला यक्व दु । त्वनेगु लः, ढःया समस्या दु, मनूतय् रोजगार मदु, नगरपालिकाय् ज्या याःवनेबलय् ढिलासुस्ती दु । नगरपालिकाय् संस्थागत भ्रष्टाचार जुयाच्वंगु दु । स्वास्थ्यया समस्या, शैक्षिक समस्या यक्व दु ।

थज्याःगु समस्या ज्यंकेत छिगु छु योजना दु ?
थज्याःगु समस्या ज्यंकेत दकलय् मध्ये माःगु धयागु सुशासन खः । जिपिं त्याना वन धाःसा दकलय् न्हापां सुशासन हयेगु जुइ, अले सकसितं सहभागी यानाः समावेशीया आधारय् विकास निर्माणया ज्या यायेगु जुइ । थ्व झ्वलय् किपू नगरपालिकायात भ्रष्टाचार मुक्त यानाः किपूयात सुव्यवस्थित नगरपालिका दयेकेगु । किपूयात छगू नमूना नगर दयेकेगु जिगु योजना दु ।

भाषा, संस्कृति सम्बन्धय् छिगु छु योजना दु ?
जि न्हापां निसें हे नेपालभाषा साहित्य सम्मेलन ब्वति कया वयाच्वनाम्ह खः । ३० सालं हे नेपालभाषा साहित्य सम्मेलन ग्वसाः ग्वयेगु ज्या याना वयाच्वनाम्ह खः । लिपा दथुइ जि थःगु हे पेशाया कारण साहित्यय् त्वःफित । अथे खःसां नेपालभाषाया अभियान्तया रुपं, नेपाल संवत्या अभियन्ताया रुपं जि दु । ने.सं. ११०० या नेपाल संवत्या आन्दोलननिसें आःतक जि निरन्तर सहभागी जुया वयाच्वनागु दु । भाषाया खँ ल्हायेगु खःसा थौंकन्हय् स्थानीय पाठ्यक्रमय् नेपालभाषा गुगु ब्वंकेगु जुयाच्वंगु दु, उबलय् नेपालभाषां ब्वंकेमाः धकाः नगरपालिकायात दबाब बिया वयाच्वनापिं मध्ये जि नं छम्ह खः ।

संस्कृति ख्यलय् धायेगु खःसा छगू सांस्कृतिक संग्रहालय दयेकेगु जिगु योजना दु । थ्व बाहेक थनया दाफा, बाजं, गुथि संरक्षण यायेगु निंतिं छगू कोष थें दयेकाः थुकियात प्रवद्र्धन यायेगु ज्या न्ह्याकेगु जुइ । थ्व झ्वलय् पर्यटन विकासयात थुकी स्वायेगु जुइ । गुबलय् तक आर्थिक विकास जुइ मखु, मेमेगु खँ जक झी सम्पन्न जुइमखु । उकिं थनया सम्पदा संस्कृतियात आर्थिक लिसे स्वाना यंकेगु जुइ । अथेहे थनया स्थानीय उत्पादनयात ब्राण्डिङ यायेगु ज्या नं जिं यायेगु जुइ ।

छि त्याइगु आधार छु खः ?
थुगुसी जि त्याइगु सम्भावना यक्व दु । न्हापा हे त्यायेमाःगु खः, प्राविधिक गल्ती जुयाः जक त्याके मफुगु खः । उबलय् उमिसं (कांग्रेसं) स्वंगू वडा त्वःतलकि मेयरय् झीत बीगु धाःगु खः । तर लिपा उमिसं मबिउ । मेयर कायेगु खःसा फुक्क हे वडा त्वःती धकाः दबाब बिया सम्झौता भंग यात । उबलय् बूगु मेगु कारण धयागु उबलय् सकलें एमाले बुकेगु धकाः लगे जुल । एमाले बुकेगु निंतिं एमालेपिंसं हे कांग्रेसय् भोट बिल, उकिं यानाः नं पराजय फयेमाल । मखुसा ला नेपाली कांग्रेसयाके उलिमछि भोट दुगु हे मखु । छगू ह्वीमया कारणं बुत । तर आः धाःसा नेपाली कांग्रेस पाखें नं जनता वितृष्णा जुइधुंकल, एमाले प्रति ला न्हापा हे वितृष्णा दुगु जुल । उकिं थ्व पालय् कांग्रेस व एमालेयात चिइकाः माओवादीयात हयेमाः धयागु छगू कथं जनताय् लहर वयाच्वंगु दु । थ्व कारणं जि त्याइ धयागु जितः विश्वास दु ।
अथेहे न्हापा माओवादी दुने हे विभाजन जुयाच्वंगु खः, आः व मदयेधुंकल । बिस्कं बिस्कं च्वनाच्वंपिं सकलें आः छथाय् वयेधुंकल । अथहे एकीकृत समाजवादी, जसपा थेंज्याःगु पार्टी नं झीनाप स्वाःवःगु दु । थुकिया लिसें माओवादीया १८ महिनाया सरकारया इलय् भ्रष्टाचारविरुद्ध याःगु आन्दोलन, भ्रष्टाचारीतय्त याःगु कारवाही, सुशासनया निंतिं याःगु ज्या आदि कारणं यानाः नं थ्व पालय् जि त्याइ धयागु पूर्ण विश्वास दु ।

अथे खःसा गुलि मत वइगु आशा यानादियागु दु ?
किपू नगरपालिकाया मेयरय् त्याकेत न्हय्द्वः मत हयेफुसा गाः । थुलि मत कायेगु धयागु जिगु लक्ष्य खः ।

अन्तय् छिगु छु धायेगु दु कि ?
किपूया जनता, मतदातातय्त छिगु छु इनाप दु धाःसा पटक पटक छिकपिंसं एमाले, कांग्रेसयागु स्थानीय सरकार स्वयादीधुंकल । थुकी छिकपिं सन्तुष्ट मजू । नगरपालिकाय दुने दुगु भ्रष्टाचार, ढिलासुस्ती खनाः छिकपिं विरक्त जुयाच्वंगु दु । यदि थुगुसी तक माओवादीयात ह्वःताः बिल धाःसा किपुली रुपान्तरण यायेगु, परिवर्तन यायेगु, सुव्यवस्थित रुपं कीर्तिपुर नगरपालिका चले यायेगु, विकास निर्माणय् दक्वसित सहभागी यायेगु जुइ । थुकिया निंतिं इँचा मुगःचाय् भोट तयाः जितः त्याकादिसँ धकाः इनाप याना ।