निजी स्कुलत मर्ज यायेगुपाखे
येँ -येँ महानगरपालिका दुनेया निजी क्षेत्रया स्कुल कोरोना महामारीया कारणं सञ्चालन याये थाकुइवं आः थवंथवय् मर्ज जुइगु क्रम अप्वया वनाच्वंगु खँ सीदुगु दु । आः तक गुलि स्कुल मर्ज जुल धइगु खँ धाःसा स्पष्ट मजूनि तर यक्व स्कुलतय्सं उकिया तयारी धाःसा यानाच्वंगु खँ विज्ञ सूत्रतय्सं धाःगु दु ।
थःगु नां कने मयःम्ह छम्ह स्कुल सञ्चालकं थःगु स्कुलय् विद्यार्थी म्हो जुइगुया लिसें विद्यार्थीतय्के फी तकं काये मफयेवं स्कुलया मस्तय्त मेगु स्कुलय् छ्वयेमाःगु खँ कनादीगु दु ।
वय्कःया कथं स्कुल पूर्ण रुपं बन्द मजूसां मस्तय्त ब्वंकेगु ज्या धाःसा बन्द यायेधुनागु जानकारी ‘नेपालभाषा टाइम्स’ यात बियादीगु दु । वय्कलं धयादिल, ‘छु याये म्हो विद्यार्थी तयाः ब्वंके फइगु अवस्था मदु, गुलिखे विद्यार्थीयाके फी काये मानि, अथे जुयाः अफिस जकसां चायेकाच्वनागु दु ।’
मासिक निगू लाख तका स्वयां अप्वः बाः पुलेत समस्या जुइवं स्कुल बन्द यायेमाःगु अवस्था वःगु धासें शिक्षकपिंत तलब तकं बी मफयेवं स्कुलया विद्यार्थीत मेथाय् छ्वयेमाःगु खँ कनादिल ।
थ्वहे झ्वलय् येँ महानगरपालिकाया शिक्षा विभागया प्रमुख मोतिराज खनालं थःपिंत स्कुल मर्ज जूगु जानकारी मवःगु खँ कनादिसें स्कुल मर्ज यायेगु निंतिं न्हापा कम्पनी रजिष्टार्ड कार्यालय वनाः जक येँमनपायात उकिया जानकारी याकीगु जुयाः तत्काल मर्जया जानकारी मवःगु खँ कनादिल ।
वय्कलं धयादिल, ‘दुने दुने मर्ज जुयाच्वंगु खँ ला न्यना तर उकिया जानकारी आः तत्काल मनपायात धाःसा वःगु मदुनि । साउन महिना क्वचायेवं उकिया जानकारी लिसे तथ्यांक नं वइ जुइ ।’
आपालं स्कुलतय्सं थःपिं मर्जय् वनेधुंकूसां नं उकियात खुल्ला रुपं धायेत भचा समस्या जुयाच्वंगुलिं यानाः नं मनपाया जानकारी वयेत लिबाःगु खँ नं वय्कलं कनादिल । कोरोना संक्रमणया कारणं यानाः येँ मनपा दुनेया आपालं स्कुल बन्द जुइगु क्रम नं अप्वया वनाच्वंगु दु । निजी स्कुलं विद्यार्थी म्हो जुइवं स्कुल सञ्चालन यायेत तकं थाकुइवं थुकथं स्कुल बन्द वा मर्जय् वनेमाःगु खँ धायेगु यानाच्वंगु दु ।
स्कुल बन्द जुयाच्वंगु बारे शिक्षा विभागया प्रमुख खनालं नं स्वीकार यानादीगु दु । वय्कलं धमाधम निजी स्कुल बन्द जुइगु अप्वया वनाच्वंगु धासें गुलि स्कुल बन्द जुल धइगु तथ्यांक साउन महिना क्वचायेवं जक वइगु जानकारी बिसें धयादिल, ‘आः हे थुलि स्कुल बन्द जुल धकाः पूर्ण तथ्यांक वःगु मदुनि, तथ्यांक वयेगु क्रम अप्वया वनाच्वंगु दु, साउन महिनाया अन्तिमपाखे गुलि स्कुल बन्द जुल धइगु तथ्यांक वइ जुइ ।’
LEAVE YOUR COMMENTS