विद्यालय व्यवस्थापन समिति कायम

येँ (नेपालभाषा टाइम्स)- येँ महानगरपालिका अन्तर्गत लाःगु फुक्कं स्कुलया विद्यालय व्यवस्थापन समिति भंग यायेगु येँ मनपाया निर्णययात सर्वोच्च अदालतं पना बिउगु दु । येँ मनपां वंगु निला न्ह्यः व्यवस्थापन समिति भंग यायेगु निर्णय याःगु खःसा वंगु वालय् थुकियात स्थानीय राजपत्रय् प्रकाशित यानाः औपचारिक रुप बिउगु खः ।

तर उकिया विरुद्ध सर्वोच्चय् लाःगु रिटयात कयाः म्हिगः प्रधानन्यायाधीश विश्वम्भरप्रसाद श्रेष्ठ, न्यायाधीशपिं ईश्वर खतिवडा, डा. आनन्दमोहन भट्टराई, प्रकाशमान सिंह राउत व सपना प्रधानया संवैधानिक इजलासं मनपाया निर्णय कार्यान्वयन मयायेत अन्तरिम आदेश बिसें व्यवस्थापन समिति भंग यायेमाःगु कारण माग याःगु दु । मनपाया थ्व निर्णय विरुद्ध अधिवक्ता कमल कोइरालां रिट तयादीगु खः ।

मनपां हालया व्यवस्थापन समिति भंग यानाः वडा अध्यक्षया अध्यक्षताय् न्हूगु व्यवस्थापन समिति स्वनेगु निर्णय याःगु खः ।