
येँ – ओरेन्टल सहकारीया पीडितपिंत हाकनं माग दावी यायेत सःतूगु दु । समस्याग्रस्त सहकारी व्यवस्थापन समितिं समस्याय् लानाच्वंगु मेगु गुंगू सहकारीया नं व्यवस्थापन शुरु यासें पीडितपिंत माग दावी यायेत इनाप याःगु खः ।
उकिया निंतिं समितिं झिगू सहकारीया बचतकर्ता, सञ्चालक, अपार्टमेन्ट बुकिङ यानातःपिं, शेयर सदस्य व त्यासा बियातःगु बैंक व वित्तीय संस्थायात थःपिंसं कायेमानिगु ध्यबाया दावी पेश यायेत आह्वान याःगु खः ।
समितिं पीडिततय्त फागुन १५ गते निसें चैत १९ गते तक समितिया ज्याकुथी थःपिंके दुगु प्रमाण सहित दावी पेश यायेत धाःगु दु । सरकारं वंगु असारय् स्ट्यान्डर्ड, प्यासिफिक, प्रभु, कोहिनुर हिल्स, कन्जुमर, कुवेर, चार्टर्ड, भेगास व स्ट्यान्डर्ड यानाः गुंगू बचत तथा ऋण सहकारी संस्थायात समस्याग्रस्त घोषणा यःगु खः ।
अथेहे ओरेन्टल सहकारीयात धाःसा २०७४ साल कार्तिकं हे समस्याग्रस्त घोषणा याःगु खः । समितिं थ्व स्वयां न्ह्यः ओरेन्टलया समस्या ज्यंकाः जक मेगु सहकारी बारे ज्या यायेगु धाःगु खःसां आः धाःसा फुक्कं व्यवस्थापन समानान्तर रुपं न्ह्यःने न्ह्याकेगु निर्णय यासें पीडिततय्गु नां व दावी मुंकेगु ज्या न्ह्याकूगु खः ।
ओरेन्टलया सम्पत्ति लिलामीका सम्बन्धय् खनेदुगु विवाद व कानुनी झंझटया कारणं लिबाःगु व मेगु सहकारी नं ओरेन्टल सहकारीलिसेया अन्तर सम्बन्ध खनेदुगुलिं मेगु सहकारीया व्यवस्थापन न्ह्याकूगु खँ धाःगु दु ।
समस्याग्रस्त फुक्क सहकारी नं ओरेन्टलया हे दुने लाःगु व ओरेन्टलया सञ्चालकपिं नं मेगु सहकारी संस्थाया सञ्चालक जुयाच्वंगु खँ समितिं धाःगु दु । मेगु गुंगू सहकारी धाःसां नं उमिगु हिस्सा १० प्रतिशत जक दुगु व मेगु ल्यं दुगु ९० प्रतिशत हिस्सा ओरेन्टलया हे जूगु, उकिं नं मेगु सहकारीपाखें जूगु ठगी नं ओरेन्टलया सञ्चालकपाखें जूगु खनेदुगु खँ सीदुगु दु ।
LEAVE YOUR COMMENTS