कैदी मदयाः जेल बन्द जागिर जोखिमय्

विश्वय् आपराधिक घटना मजूगु देय् गनं दइमखु जुइ, शायद हे जक अज्याःगु देय दइ, गन, अपराधया घटना मजूगु दयेमाः । अझ धायेगु खःसा विश्वन्यंकभनं हे अपराधया घटना थुकथं अप्वया वनाच्वंगु दु कि उकियात ज्यंकेत सरकार, सुरक्षा निकाय व सरोकारवालातय् निंतिं कपाः स्याःगु विषय जुया बिउगु दु ।

अझ गुलिं गुलिं देशय् ला अपराधया घटना थुभनं अप्वया वनाच्वंगु दु कि अन अपराधीतय्त तयेगु थाय् अर्थात जेलया हे नं अभाव जुयाबिउगु दु । अपराधीतय् ल्याः अप्वयेवं थुकथंया समस्या खने दुगु खः । थ्व सन्दर्भय् युरोपेली राष्ट्रय् छगू अज्याःगु देय् दु, गन छम्ह हे अपराध याःपिं छम्ह हे कैदी मदु ।

गनं अपराध याइपिं अप्वयाः इमित तयेगु थाय् मदयाः समस्या जुया बिउगु दुसा गनं छम्ह हे अपराधी वा कैदी मदयाः नं समस्या जुयाबिउगु दु । छम्ह अपराधी वा कैदी मदयाः थ्व कारणं समस्या जूगु खः कि देशय् च्वंगु दक्व हे जेल बन्द यायेमाःगु स्थिति तकं वया बिउगु दु ।
देशय् छम्ह नं कैदी वा अपराधी मदुगु देय् खः नेदरल्याण्ड ।

थन अपराधया मात्रा थुलि म्होतक म्हो दु कि थन छम्ह हे कैदी मदु । अर्थात कैदी शुन्यया संख्याय् दु । थ्व हे कारणं देशय् च्वंगु दक्वं जेल बन्द यायेमाःगु अवस्था वःगु खः । समस्या थुकी हे जक सीमित मजू । समस्या ला थ्व स्वयां मेगु छु धाःसां जेल बन्द यायेमाःगु स्थिति वयेवं झण्डै निद्वः स्वयां अप्वः कर्मचारीया जागिर नं जोखिमय् लाःगु दु ।

जब जेलय् छम्ह हे कैदी मदुसा जेल ला अवश्य नं बन्द यायेमालीगु ला जु हे जुल, उकिया नापनापं कर्मचारीतय्त नं विदा बीमाःगु स्थिति वःगु खः ।नेदरल्याण्डया कुल जनसंख्या १ करोड ७१ लाख ३२ हजार दु । अथे खःसां छुं नं अपराध याःगु द्वपनय् छम्ह हे जेलय् च्वनेमाःगु स्थिति देशय् मदु ।

सन् २०१३ तक थन जम्माजम्मी १३ म्ह जक कैदी दुगु खःसा थुपिं सकलें कैदीं कैद भुक्तान यायेवं सन् २०१८ तक थ्यंगु इलय् देशय् कैदी शून्य जुयाबिल । जेल दक्वं कैदी शुन्य जूगु जक मखु खण्डर वा भूत बंगला थें हे जुल ।

जेलया स्थिति थज्याःगु जुइवं अनया सरकारं दक्वं जेल बन्द यायेगु निर्णय याःगु खःसा जागिर जोखिमय् लाःपिं निद्वःमध्ये न्हय्सं स्वयां अप्वः कर्मचारीयात मेमेगु हे ज्याकुथिइ तकं सरुवा यायेमाःगु स्थिति वःगु खः ।आः ल्यं दुपिं १३०० कर्मचारीयात नं इमित पायक जूगु ज्याकू छनोट यानाः सरुवा यायेगु तयारी जुयाच्वंगु दु । थ्व ल्याखं नेदरल्याण्ड विश्वया हे दकलय् सुरक्षित देय् जुइत सफल जूगु दु ।

 

सम्बन्धित बुखँ

LEAVE YOUR COMMENTS