ओस्कार थुगुसी नं विवाद
विश्वय् नांजाःगु फिल्म अवार्ड ओस्कार थुगुसी ९१ दँ क्यन । संसारय् न्ह्याथाय् च्वंम्ह फिल्मकःमि थजुइमा वं जीवनय् छक्वः थ्व ओस्कार अवार्ड कायेदःसा जिउ धइगु मतिइ लुइकाच्वनी । अले दँय्दसं थ्व अवार्ड जुइगु इलय् थ्व अवार्ड सुनां त्याकी धइगु खँयात कयाः नं आपाःसिनं थःथःकथं अनुमान याना च्वनी ।
थुगुसी बेस्ट फिल्मया अवार्ड मेक्सिकोया फिल्म “रोमा” यात मू हकदार कथं कयातःगु खः, तर रिजल्ट पाय्छि अःखः जुयाबिल । थ्व सिरपाः “ग्रीन बुक” नांयागु फिल्मयात बिल ।
विशेष यानाः ओस्कार अवार्ड वा मेमेगु फिल्म अवार्डय् सिरपाः त्याकीपिनिगु सम्भावित नांधलः पिकाइगु नोमिनेशनया धलखय् बेस्ट फाइभ धकाः न्यागू न्यागू नांया धलः पिकाइगु खः, तर थुगुसीया ओस्कार अवार्डया नोमिनेशनया धलखय् बेस्ट फिल्मपाखे “ग्रीनबुक”, “बोहेमियन ¥यापसोडी”, “ब्ल्याक प्यान्थर”, “अ स्टार इज बर्न”, “रोमा”, “ब्ल्याकक्लान्सम्यान”, “द फेभरेट” व “भाइस”नापं यानाः च्यागू फिल्मया नां दुथ्याकातःगु खः ।
थुकिं यानाः नोमिनेशनया इलय् हे छगू कथंया विवादया सः थ्वयेधुंकूगु खः । उकिसनं यक्वसिया अनुमान अःखः बेस्ट फिल्मया सिरपाः लाःबलय् आपाःसिनं थुगुसीया अवार्ड ओस्कारया इतिहासय् हे दकलय् बांमलाःगु निर्णय कथं कुंखिउँगु दु । हलिउडय् आपालं अश्वेत फिल्मकःमित दु, तर सिरपाः धाःसा आपाः यानाः तुयुपिं फिल्मकःमिपिंत लाइगुलिं “ओस्कर इज सो ह्वाइट” धकाः नं धायेगु याः ।
थुगुसी बेस्ट फिल्मया सिरपाः त्याकूगु “ग्रीन बुक” फिल्म हाकुुपिं व तुयुपिं दथुया कुलिचिनायात न्ह्यब्वयेगु कुतः यानातःगु फिल्म खः । थ्व फिल्मया निर्देशक पिटर फेरेल्लीं अश्वेत वर्गया मर्मयात फिल्मया पर्दाय् पित हयेमफुगु द्वपं बियातःगु दु । बेस्ट फिल्मया अवार्ड त्याकूसां “ग्रीन बुक”या निर्देशकं बेस्ट डाइरेक्टरया अवार्ड धाःसा त्याके मफुत ।
थ्व अवार्ड धाःसा बहुचर्चित फिल्म “रोमा”या निर्देशक अल्फांसो कुरोआनं त्याकल । विशेष यानाः फिल्म अवार्डय् बेस्ट फिल्म व बेस्ट डाइरेक्टरया अवार्ड छगू हे फिल्मं त्याकीगु याइ, तर थुगुसी ओस्कारय् धाःसा अथे मजुल । विदेशी भाय्या धेंधेंबल्लाखय् जापानया “सफलिफ्टर्स” व पोल्याण्डया “कोल्ड वार” नं दुगु खःसा अवार्ड मेक्सिकोया “रोमां” त्याकल ।
विदेशी भाय्या फिल्मया धेंधेंबल्लाखय् लानाच्वंगु फिल्म हे मेन क्याटागोरीया धेंधेंबल्लाखय् लाइगु धइगु म्हो जक जुइगु याः । सन् २००१ या ओस्कर अवार्डय् चीनया निर्देशक आङ्ग लीया फिल्म “क्राउचिङ्ग टाइगर हिडन ड्रायगन” नं थथे विदेशी भाय्या फिल्मया नापनापं मेन क्याटागोरीया नोमिनेशनय् लाःगु खः । उबलय् थ्व फिल्मं बेस्ट फोरेन ल्यांग्वेजया सिरपाः जक त्याकूगु खः ।
उगु दँय् बेस्ट फिल्मया अवार्ड “ग्लाडियटर” व बेस्ट डाइरेक्टरया अवार्ड “ट्राफिक” फिल्मपाखें स्टीभन सुदरबर्गं त्याकूगु खः ।थुकथं ओस्कार अवार्डय् बेस्ट फिल्म व बेस्ट डाइरेक्टर बिस्कं बिस्कं फिल्मं त्याकीगु धइगु न्हूगु खँ मखु धइगु याउँक हे क्यं । उलि जक मखसे बेस्ट फिल्मया सिरपाः नं आपाःसिनं अनुमान याःगुया अःखः हे वयाच्वंगु दु ।
सन् २०११ य् निर्देशक डेभिड फिन्चरया “द सोसियल नेटवर्क” फिल्मं बेस्ट फिल्मया अवार्ड त्याकीगु अनुमान यानातःगु खःसा अवार्ड धाःसा निर्देशक टम हुपरया “द किंग्स स्पीचं” त्याकल । अथे हे सन् २०१६ य् “द रेभेनेन्टं” अवार्ड त्याकीगु अनुमान यानातःगु खःसा “स्पटलाइटं” त्याकल ।
थुगुसी बेस्ट फिल्मया अवार्ड त्याकूगु फिल्मयात नोमिनेशनय् लानाच्वंगु च्यागू फिल्म मध्ये दकलय् फ्यासुगु फिल्म कथं कयातःगु खः । तर अवार्ड धाःसा उगु हे फिल्मं त्याकल । थथे नोमिनेशनय् लानाच्वंगु दकलय् फ्यासुगु फिल्मयात अवार्ड बिउगु थ्व न्हापांखुसी धाःसा मखु, थ्वसिबें न्हापा सन् २००६ या ओस्कारय् नं “क्रायस” नांयागु फिल्मयात बेस्ट फिल्म अवार्ड बिउबलय् “ब्रोकब्याक माउण्टेन”, “क्यापोट”, “म्युनिख” व “गुडनाइट एण्ड गुडलक” थेंज्याःगु फिल्म नोमिनेशय् लानाच्वंगु खः ।
उबलय् नं “क्रायस”यात अवार्ड बिउबलय् तसकं हे विरोध जूगु खः । थुगुसी नोमिनेशनय् लानाच्वंगु “ब्ल्याक प्यान्थर” छगू सुपरहिरो फिल्म खःसां थुकी अफ्रिकाया जीवनशैली व तजिलजियात बांलाक हे न्ह्यब्वयातःगु दु । बनेज्याय् न्ह्यःने हे लाःगु थ्व फिल्मयात समीक्षकतसें तारीफ नं याःगु खः । थ्व फिल्मं ओरिजनल म्युजिक स्कोर, कस्ट्युम डिजाइन व प्रोडक्शन डिजाइन यानाः स्वंगू अवार्ड त्याकल ।
विशेष यानाः फिल्म धयागु हलय् क्यनी, अले फिल्मया सफलताया अमू बक्स अफिसय् कमे याइगु दां जुयाच्वनी, अले ओस्कारया नोमिनेशनय् लाःगु फिल्मया बक्सअफिस कलेक्सन चर्चाया विषय जुयाच्वनी, तर “रोमा” छगू अज्याःगु फिल्म जुयाबिल गुगु फिल्मया बक्सअफिस कलेक्सन शून्य क्यनातःगु दु । छाय्धाःसां थ्व हलय् रिलिज जूगु फिल्म मखसे नेटफ्लीक्सय् रिलिज जूगु खः ।
थ्व इन्टरनेटया माध्यमं स्वकुमिपिंसं छेँछेँय् च्वनाः स्वयाच्वंगु फिल्म खः । थ्व फिल्मया निर्देशक अल्फांसो कुरोआनं बेस्ट क्यामेराम्यान व बेस्ट डाइरेक्टर यानाः निगू व बेस्ट फोरेन ल्यांग्वेज नापं यानाः फिल्मं स्वंगू सिरपाः त्याकल । “बोहेमियन ¥यापसोडी”इ लीड रोल म्हितूम्ह रामी मलिकं बेस्ट एक्टरया अवार्ड त्याकलसा थ्व फिल्मं बेस्ट साउण्ड मिक्सिंग व बेस्ट एडिटिंग नापं यानाः प्यंगू अवार्ड त्याकल ।
बेस्ट एक्ट्रेसया अवार्ड “द फेभरेट”या निंतिं ओलिभिया कोल्मनं त्याकलसा सपोर्टिंग एक्टर “ग्रीन बुक”या मेहर्शा अलि अले सपोर्टिंग एक्ट्रेस “इफ बियल स्ट्रीट कुड टक”या रेगना किंगं त्याकल । ओस्करयात “ओस्कर इज सो ह्वाइट” धकाः द्वपं बियातःसां थुगुसी अश्वेत फिल्मकःमि स्पाइक लीयात बेस्ट अडप्टेड स्क्रीनप्लेया निंतिं “ब्ल्याकक्लान्सम्यान” पाखें छगू अवार्ड वल ।
थ्व फिल्मया स्क्रीनप्ले चार्ली वाचेल, डेविड रोबिनविज व केभिन विलमोटलिसे जानाः स्पाइक लीं च्वःगु खः । थ्व ल्याखं थ्व अवार्ड स्पाइक लीया व्यक्तिगत अवार्ड धाःसा मजुल । थुगुसीया अवार्डया दकलय् तःधंगु विशेषता धइगु छु धाःसां अवार्ड ज्याझ्वःया नितिं सुं नं अफिसियल उद्घोषक क्वःछिनातःगु मदु । ज्याझ्वःन्ह्याकामि हे मतसे अवार्ड ज्याझ्वः क्वचायेकूगुयात आपाःसिनं अजूचायापुगु खँ कथं काःगु दु ।
उद्घोषकया रुपय् क्वछिनातःम्ह केभिन हर्टं समलिङ्गीतय्गु बारे बांमलाःगु टिप्पणी याःगु द्वपं लाःगुलिं व थःम्हेसिनं हे ज्याझ्वः मन्ह्याकेगु घोषणा याःगु खः । लिपा ओस्कार एकेडेमीं मेपिं मालेगुसिबें अफिसियल प्रोग्राम होस्ट हे मतयेगु निर्णय याःगु खः । थुगुसी “ग्रीन बुक”यात बेस्ट फिल्मया अवार्ड बिउगुयात कुंखिनीपिंसं ओस्कार कमिटी आःतक नं न्हूगु बिचाः ज्वनाः न्ह्याःवने मफुनिगु व स्वीदँ न्ह्यःया हे बिचाःया लिंधसाय् न्ह्यानाच्वंगु दु धकाः नं धायेगु यानाहःगु दु ।
LEAVE YOUR COMMENTS