च्वापुफय्या निर्देशक प्रदीप खड्गी दुर्घटनाय्, सुटिङ दित
येँ – दकलय् अप्वः लगानी तयाः दयेकाच्वंगु नेपालभाषाया संकिपा च्वापुफय्या निर्देशक प्रदीप खड्गी मोटरसाइकल दुर्घटनाय् लाःगु दु । वय्कः किपूया न्हूबजारय् दुर्घटनाय् लाःगु खः ।
दुर्घटनाय् लानाः निर्देशक खड्गीया छातिया जवय्पाखे क्वँचय् समस्या खनेदुगु खँ किर्तिपुर अस्पतालं धाःगु दु । वय्कःया लिसें सहायक निर्देशक विनेश श्रेष्ठं दुर्घटनाय् लानाः घाःपाः जूगु खः ।
निर्देशक खड्गी दुर्घटनाय् लाःगुलिं आः च्वापुफय्या सुटिङ छुं न्हिया निंतिं दिउगु दु । वय्कः थ्व हे फिल्मया सुटिङ यानाः छेँय् लिहां वनाच्वंगु इलय् दुर्घटना जूगु खः । ‘तत्कालिन श्री ३ महाराज जंगबहादुर राणाया छगू सिन शुटिङ यानाः छेँय् लिहां वयाच्वनागु इलय् दुर्घटना जुल’ वय्कलं धयादीगु दु ।
नेपालभाषाया कृति ‘जि वया ला लछि मदुनि’ आधारय् दयेकाच्वंगु थ्व फिल्म हिमआँधीया नामं नेपाली, अंग्रेजी व चिनिया भासं नं दयेकाच्वंगु खः । तिब्बतया ल्हासा, दोलखाया कालिञ्चोक, मुस्ताङ, ख्वप व येँय् सुटिङ क्वचायेकाः आः थ्व फिल्मया सुटिङ पनौतिइ जुयाच्वंगु दु । ‘पनौतिइ सुटिङ क्वचायेकाः लिहां वयाच्वनागु इलय् दुर्घटना जुल’ वय्कलं धयादीगु दु ।
वय्कःयात चिकित्सकतय्सं छुं न्हि पूवंक आराम कायेत धाःगुलिं सुटिङ नं दिकूगु खः । फिल्मया सुटिङ ९० प्रतिशत क्वचायेधुंकूगु दु । वय्कः ऐतिहासिक फिल्म कीर्तिपुर द लिजेन्द अफ कीर्तिलक्ष्मीया निर्देशक नं खः ।
तत्कालिन तिब्बतया ल्हास व नेपाःया व्यापारिक स्वापू, राजनीतिक अस्थिरता व मतिनाया बाखनय् थ्व फिल्म दयेकाच्वंगु खः । महाजु फाउन्डेसनया ब्यानरय् दयेकाच्वंगु थ्व फिल्मया कार्यकारि निर्माता व परिकल्पनाकार ओमचरण अमात्य खः ।
फिल्मय् सनिश शाक्य, निकी महर्जन, राजेन्द्रमान शाक्य, आशाकाजी थकू, सुशील राजोपाध्याय, सुरज व्यञ्जनकार, रुपेन्द्र श्रेष्ठ, राजेन्द्र महर्जन, संजय शर्मा राजोपाध्याय, ह्रदय प्रसाद मिश्र, श्यामसुन्दर शिल्पकार, अरुणेश्वरी शिल्पकार, मञ्जु श्रेष्ठ व पल्पसा डंगोलपिंसं म्हिताच्वंगु दु । शंकर महर्जनया छायांकन दुगु फिल्मय् बालमुकुन्द प्रजापतिं कला निर्देशन याःगु दुसा रक्की महर्जन, सागर महर्जन व विनेश श्रेष्ठं सहायक निर्देशन यानाच्वंगु दु ।
LEAVE YOUR COMMENTS