लुँ तस्करी अप्वल

येँ (नेपालभाषा टाइम्स)÷ नेपालय् आधिकारिक रुपं विदेशं लुँ आयात म्हो जुयाच्वंगु इलय् हे लुँ तस्करी अप्वया वनाच्वंगु दु । लुँ तस्करी अप्वःगु कारण धाःसा थौंकन्हय् जुयाच्वंगु आर्थिक मन्दी व सरकारी नीति जूगु खँ लुँ वहः व्यवसायीतय्सं धाःगु दु ।

आर्थिक मन्दीया कारणं लगानी यायेगु मेगु थाय् मदयेवं मनूतय्सं लुँ तस्करीइ लगानी यानाच्वंगु अनुमान याःगु दु । न्हापा न्हापा जूसां शेयर, जग्गा लगायत थासय् लगानी यानाच्वंपिं छुं छुं चलाखपिं मनूतय्सं थौंकन्हय् लुँइ लगानी यानाच्वंगु खनेदुगु खँ धाःगु दु ।

सरकारं वंगु बजेटय् लुँ आयात यायेबलय् १५ प्रतिशत कर कायेगु नीति हःगुलिं यानाः नं मनूत लुँ तस्करी यायेगुपाखे वनाच्वंगु लुँ वहः व्यवसायी महासंघया पुलांम्ह अध्यक्ष लिसें बजाः विश्लेषक तेजरत्न शाक्य ‘नेपालभाषा टाइम्स’ यात कनादीगु दु ।

वय्कःया कथं न्हापा १ किलो लुँ आयात यायेबलय् ८ लाख भन्सार पूसा गाःगु खःसा थौंकन्हय् १२ लाख ५० हजार तका भन्सार पुलेमाः । सरकारी करपाखें बचे जुइगु निंतिं नं छुं छुं मनूतय्सं लुँ तस्करी लगानी याःगु अनुमान वय्कलं यानादीगु दु । वय्कलं धयादिल, ‘किलोय् ४ लाख ५० हजार तका बचे यायेगु नितिं नं मनूत लुँ तस्करीइ वनाच्वंगु खः ।’

नेपालभाषा टाइम्सलिसे खँ ल्हायेगु झ्वलय् वय्कलं धयादिल, ‘सरकारं गुगु कर अप्वयेकेगु ज्या याःगु दु थुकिं तस्करी अप्वइ धकाः जिमिसं सरकारयात धयागु नं खः तर खँ मन्यं थुकिं यानाः लुँ तस्करी अप्वया च्वंगु दु । उकथं हे नेपाःया आवश्यक मात्राय् सरकारं लुँ आयात याके मबिउगुया लिच्वः कथं नं तस्करतय्त प्रोत्साहन जुयाच्वंगु दु ।

तस्करी म्हो यायेगु खःसा नीति निर्मातातय्सं बिचाः यायेमाःगु खँ धयादिसें वय्कलं सरकारं अप्वयेकूगु करयात कयाः समीक्षा यायेमाःगु खँ धयादीगु दु । सरकारं न्हिथं लुँ तस्करयात ज्वनाच्वंसां नं लुँ तस्करतय्सं न्हू न्हूगु लँपुं लुँ तस्कर यायेगु ज्या धाःसा त्वःतूगु मदुनि ।

वंगु छुं न्हिं न्ह्यः जक त्रिभुवन अन्तर्राष्ट्रिय विमानस्थलं १४ किलो लुँ ज्वंगु खः । १४ किलो लुँ ज्वनेवं भन्सार अधिकृत मणिराम पौडेलया संयोजकत्वय् नीस्वंगु छानविन समितिं ज्वंपिनिगु पुचलं जक १३८ किलो लुँ नेपालय् दुत हयेधुंकूगु प्रतिवेदन बिउगु खः ।

सम्बन्धित बुखँ

LEAVE YOUR COMMENTS