लहलहलय् शेयर लगानी मयायेत इनाप

छु छिं मेपिंसं धाःगु भरय् लहलहलय् लगे जुयाः शेयर बजारय् लगानी यानाच्वनागु दु कि ? नेपाल स्टक एक्सचेञ्चय् कारोवार मापक नेप्से परिसूचक उच्च अंकय् थहां वनाच्वंगु इलय् लबः दइ धकाः खँ हे मथुइक शेयर बजारय् दुहां वनागु दु कि ? यदि अथे खःसा छिं कमे याइगु मखुकि, लगानी यानागु ध्यबा समेत गुमे याये मालेफु ।

लिपांगु इलय् नेप्सेय् खनेदुगु चमकया कारणं छुं बिचाः हे मयासे लगानी जुइगु अप्वया वयेवं नियामक निकाय नेपाल धितोपत्र बोर्डं लगानीकर्तातय्त सचेत याःगु दु । बोर्डं शेयरय् लगानी यायेबलय् लहलहया भरय् वा हल्लाया भरय् लगानी मयायेत इनाप याःगु दु । धितोपत्र बजारय् शेयर कारोवारया मापक नेप्सें जक फुक्कं निर्धारण याइमखु ।

तर बजाः मदिक्क च्वय् थहां वनाच्वन धाःसा सकसितं लय् हे तायेकी । म्हो लगानीइ बांलाःगु प्रतिफल दइगु लोभय् यक्व लगानीकर्तातय्सं खँ हे मथुइक शेयर बजारय् लगानी यानाच्वंगु खनेदु ।

नेपाल स्टकर एक्सचेञ्चया कथं मंगलवाः नेप्से परिसचूक २९६० अंकय् थ्यंगु दु । बजारया मनोविज्ञान मथुइकं शेयर बजारय् लगानी यायेबलय् उकिं नकारात्मक प्रभाव लाकी । लहलहलय् वनाः याइगु निर्णय थःगु निंतिं हे घातक जुइगु बोर्डया धापू दु ।

लिपांगु इलय् धितोपत्र बजारय् शेयरया भाः तसकं थहां वनाच्वंगु दु । शेयर बजारय् कारोवार मापक नेप्से परिसूचक थहां वंगु अवस्थाय्लगानीकर्ताया जोखिमया स्तर नं अप्वया वनीगु जूगुलिं थ्व बारे लगानीकर्ता थःम्हं हे ध्यान बियाः लगानी यायेत बोर्डं इनाप याःगु दु ।

बोर्डं लिपांगु इलय् ल्ह्वंगु पलाःया कारणं बजारय् सर्वसाधारणया सहभागीता न्ह्यथनेबहः कथं अप्वया वनाच्वंगु दु । बोर्डया अध्यक्ष भीष्मराज ढुंगानाया कथं २०७७ असार तक १७ लाखया ल्याखं दुगु हितग्राही खाता आःतकया दुने शतप्रतिशत हे अप्वयाः ३५ लाखं च्वय् थहां वंगु दु । अथेहे २०७७असारय् थ्यंमथ्यं न्ह्य्गू लाखया ल्याखय् दुगु मेरो शेयरया खात नं दछिया दुने स्वंगूत्या गुणां अप्वया २६ लाख थ्यंगु दु ।

बोर्डया कथं धितोपत्रया प्रारम्भिक निष्काशनय् थगुने अप्वलय् न्यागू लाखम्हेसिनं ब्वति काइगुलिं आः छगू निष्काशनय् हे १८ लाखया आवेदन वइगु जुयाच्वंगु दु । थगुने असारय् अनलाइन कारोवारयानिंतिं ३५ हजारम्हेसिनं युजर आइडी काःगुलिइ आः १७ गुणा अप्वयाः ६ लाख ६० हजार थ्यंगु दु । अथेहे औसतय् खुगू लाख लगानीकर्ता कारोवारय् सक्रिय जुयाच्वंगु दु ।

चालु आर्थिक दँया झिला दुने धितोपत्रया प्राथमिक बजार पाखें ७८ अर्ब बराबरया पूँजी परिचालन जूगु दु, गुगु २८ दँया इतिहासय् हे दकलय् उच्च खः । थगुने असारय् तक १३६२ अंकय् थ्यनाच्वंगु नेप्से परिसूचक आः २९०० बिन्दुइ तक थ्यनेधुंकूगु दु ।

बोर्डया प्रवक्ता निरज गिरीया कथं बजारया विकासया अवस्था स्वयेबलय् थीथी इलय् घटबढ जुयाच्वने धुंकूगुलिं लगानीकर्तातय्सं जोखिम बहन यायेफइगु क्षमता स्वयाः सुझबुझपूर्वक निर्णय यानाः लगानी यायेमाःगु आवश्यक दु । धितोपत्रया निगूगु बजारय् कारोवार अप्वयेया वंलिसें शेयर कर्नरिङ, सर्कुलर ट्रेडिङ यागु गुनासो नं वयाच्वंगु बोर्डया धापू दु । थ्व बारे बोर्डं आवश्यक अध्ययन यानाच्वंगु खँ धाःगु दु । अध्ययनया निंतिं छुं ई काइगु जूगुलिं बोर्डं धितोपत्र लगानीसम्बन्धी ऐन २०६३ इ यायेमजिउ धकाः धयातःगु क्रियाकलापय् संलग्न मजुइत सकसितं इनाप याःगु दु ।

लगानीकर्तायात देय्या आर्थिक परिदृश्यय् सुचीकृत कम्पनीया वित्तीय कार्यसम्पादनया आधारभूत विश्लेषण प्रति शेयर आम्दानी, नेटवर्थ, मूल्य आम्दानी अनुपात, किताबी मूल्यय् बजार मूल्यया अनुपात आदिया विश्लेषण यानाः जक लगानी यायेत बोर्डं इनाप याःगु दु । बजाः भाःसम्बन्धी प्राविधिक विश्लेषण, संस्थागत सुशासनया अवस्थायात समेत स्वयाः लगानी यायेत बोर्डं सकसितं इनाप याःगु दु ।

लगानीया निर्णय यायेबलय् सम्बन्धित क्षेत्र, उद्योग व कम्पनीया हरेक पक्षया जानकारी कायेगुलिसें धितोपत्र बजारया अवस्थाया अध्ययन यायेत बोर्डं सुझाव बिउगु दु । धितोपत्रया निगूगु बजारय् शेयर कारोवार विद्युतीय माध्यमपाखें छेँय् छेँय् हे च्वनाः जुयाच्वंगु दु । थौंकन्हय् ९० प्रतिशत कारोवार थ्व हे माध्यमं जुइ । धितोपत्रया प्राथमिक व निगूगु बजारय् लगानी याइपिनि ल्याः अप्वया वनाच्वंगु दु । बजाःया सिद्धान्त कथं बजार थहां कुहां जुइगु जूगुलिं लगानीकर्तातय्सं लगानी यायेबलय् जोखिम नं जुइ धयागु खँयात ध्यानय् तयाः लगानी यायेत इनाप यानागु बोर्डया प्रवक्ता गिरीं धयादीगु दु ।