लिउने लानाच्वंगु समुदायया आरक्षण कोटा क्वपालेगु विधेयक

येँ – निजामति कर्मचारी ख्यलय् थीथी क्लस्टरय् बिया वयाच्वंगु आरक्षण आः क्वपालीगु जूगु दु । संसदय् दर्ता जूगु कर्मचारी विधेयकं थ्व स्वयां न्ह्यः मिसा, जनजाति, दलित, मधेशी, अपांङता दुपिंत बिया वयाच्वंगु आरक्षण म्हो जुइत्यंगु खः ।

थौंकन्हय् लागू जुयाच्वंगु निजामति सेवा ऐन, २०६४ स निजामति सेवाय् ४५ प्रतिशत आरक्षणयात १०० माने यानाः मिसायात ३३, जनजातियात २७, मधेशीयात २२, दलितयात ९, अपांगता दुपिंत ५ प्रतिशत आरक्षण बियातःगु खः । तर आः संसदय् दर्ता जूगु विधेयकय् आदिवासी जनजातियात २४, मधेशीयात २०, अपांगता दुपिंत ३ व झारी, थारु व मुस्लिमयात थप याःगु दु ।

उगु व्यवस्थायात सम्बन्धित क्लस्टरया सांसदतय्सं धाःसा आपत्ति प्वंकूगु दु । उमिसं आरक्षण कटौती संविधान अःखः ज्या याःगु धासें उकियात संशोधन यायेत माग याःगु दु ।

सांसदतय्सं विधेयकय् छकः जक आरक्षणया उपभोग याये दइकथं न्हूगु व्यवस्था याःगु धासें उकियात नं संशोधन यायेत माग याःगु दु । खरिदार जुइमा वा अधिकृत सुं नं व्यक्तिं छकः जक आरक्षण उपभोग याये दइगु व्यवस्था चीकेमाःगु उमिगु माग खः ।

विधेयक कथं आः मधेशी दलित मिसां छगू जक समूहपाखें आरक्षणया उपभोग याये दइ । थ्व स्वयां न्ह्यः मधेशी दलित मिसां मिसा, दलित व मधेशी कोटां प्रतिस्पर्धा यायेदइगु व्यवस्था दुगु खः । अथेहे खुला यानातःगु आरक्षण कोटाय् पदपूर्ति जुइ मफुत धाःसा मेगु दँय् उगु कोटायात खुल्लाय् यंकेगु व्यवस्था दु । थ्व स्वयां न्ह्यः स्वक्वःगु खुसिइ जक खुल्लाय् यंकेगु व्यवस्था दुगु खः ।