संयुक्त राष्ट्रसंघया महासभाय् सम्बोधन याके बिइत तालिबानया इनाप

एजेन्सी- न्यूर्योकय् जुयाच्वंगु संयुक्त राष्ट्रसंघया महासभाय् थःपिंत नं सम्बोधन याके बिइत तालिबानं इनाप याःगु दु । तालिबानया विदेशमन्त्री अमिर खान मुक्ताकीं सोमवाः संयुक्त राष्ट्रसंघयात पत्र छ्वयाः महासभाय् थःपिंत नं नवाके बिइत इनाप याःगु खः । तालिबानं दोहाय् च्वनाच्वंम्ह प्रवक्ता सुहेल साहीनयात महासभाया प्रतिनिधि नियुक्त याःगु दु । तालिबानं न्हापायागु सरकारं नियुक्त यानातःपिं प्रतिनिधितय्सं देय्या प्रतिनिधित्व मयाइगु नं धाःगु दु ।

तालिबानं याःगु इनापयात कयाः आ संयुक्त राष्ट्रसंघया क्रेडेन्सियल कमिटीइ छलफल जुइ, तर संयुक्त राष्ट्रसंघया महासभा जुयाच्वँँच्वं थ्व कमिटीया बैठक च्वनीगु सम्भावना धाःसा म्हो जक दु । थ्व कमिटीइ अमेरिका, चीन, रुस नापं यानाः ९ गू देय् दु । राष्ट्रसंघया नियमकथं बैठक मजूतले अफगानिस्तानया निंतिं पुलांम्ह हे प्रतिनिधि गुलाम इसाक्जाइं अफगानिस्तानया प्रतिनिधित्व याइ । महासभाया अन्तिम न्हिकुन्हुं गुलाम इसाक्जाइं सम्बोेधन याइगु ज्याझ्वः दु ।

तलिबानं न्हापा अफगानिस्तान कब्जा याःबलय् नं राष्ट्रसंघय् पुलांगु सरकारया हे प्रतिनिधित दुगु खः । मंगलवाः जूगु राष्ट्रसंघया बैठकय् कतारं विश्वया नेतातय्त तालिबानलिसे स्वापु तयेत इनाप याःगु खः । तालिबानयात बहिष्कार यात धाःसा ध्रुवीकरण अप्वइगु कतारं धाःगु दु ।