अर्घाखाँची नेवाः समाजया साधारणसभा व अधिवेशन

येँ(नेपालभाषा टाइम्स)- नेवाः समाज अर्घाखाँची रुपन्देहीया प्यक्वःगु साधारणसभा व निक्वःगु महाधिवेशन नं न्हूगु ज्यासना पुचः ल्यःगु दु । अर्घाखाँची जिल्लाय् जन्म जुयाः थीथी कारणं रुपन्देहीयात कर्मस्थल दयेका वयाच्वंपिं नेवाः समुदाय जानाः नीस्वनातःगु समाजया अधिवेशनं न्हूगु ज्यासना पुचः ल्यःगु खः ।

अधिवेशनं देवीकुमार श्रेष्ठया अध्यक्षताय् झिंन्हय्म्हेसिया ज्यासना पुचः ल्यःगु खः । ज्यासना पुचलय् दुर्गाप्रसाद श्रेष्ठ न्वकु, दिलप्रसाद श्रेष्ठ छ्याञ्जे, फुलमाया श्रेष्ठ लिउछ्याञ्जे, राजकुमार श्रेष्ठ दांभरिं व बाबुराम (लभकुस) श्रेष्ठ लिउदांभरिइ ल्यःगु खः । अथेहे मू दुजलय् विष्णु प्रसाद श्रेष्ठ, गिरिराज श्रेष्ठ, दीपककुमार श्रेष्ठ, दामोदर श्रेष्ठ, सरस्वती श्रेष्ठ, मधुकुमार श्रेष्ठ, राजेन्द्रकुमार श्रेष्ठ, गणेश श्रेष्ठ, खड्काबहादुर श्रेष्ठ, सरिता श्रेष्ठ र दुर्गाबहादुर श्रेष्ठ निर्वाचित जूगु दु । लेखा समितिया संयोजकय् जीवन श्रेष्ठ दुजलय् मधुकुमार श्रेष्ठ व मेघराज श्रेष्ठ निर्वाचित जूगु निर्वाचन समितिया संयोजक नवराज श्रेष्ठं कनादिल ।

समाजं अर्घाखाँची जिल्लाया नेवाःतय् मौलिक, पौराणिक, धार्मिक, सांस्कृतिक महत्वया सापारु, रोपाइँ जात्रा, भैरव प्याखं लगायत थीथी संस्कृति, संस्कारयात बुटवलय् नं तःदँ न्ह्यःनिसें तःजिक हनेगु याना वयाच्वंगु दु । अर्घाखाँची जिल्लाया नेवाः समुदायया मौलिक कला, संस्कृति, भेषभूषा, नसात्वँसां, जात्रा, पर्व, संस्कृतिया संरक्षण यायेगु नापं रुपन्देही च्वनाच्वंपिं नेवाःतय्त समस्या व आपद विपदया इलय् ग्वाहालि यायेगुकथं समाजं थीथी ज्याझ्वः याना वयाच्वनागु समाजया नवनिर्वाचित नायः श्रेष्ठं कनादिल । समाजय् थौंकन्हय् न्यासः स्वयां अप्वः दुजः दुगु व उकीमध्ये निसत्याः आजीवन दुजः दु ।