ने. सं. ११४३ ञलाथ्व चतुर्दशी -

तालिबानपाखें निन्हुया दुने निगू प्रान्तीय राजधानीइ कब्जा

एजेन्सी- तालिबानतय्सं निन्हुया दुने निगू प्रान्तीय राजधानीइ कब्जा याःगु दु । आफगानिस्तानया दक्षिण पश्चिमय् लाःगु निम्रोज प्रान्तया जारन्जयात शुक्रवाः कब्जा काःगु २४ घौ लिपा हे उत्तरी क्षेत्रय् च्वंगु जोजन राज्यय् च्वंगु सेबर्घान शहर नं कब्जाय् काःगु खः । अन्तर्राष्ट्रिय सञ्चार माध्यमतय्सं बिउगु जानकारीकथं अफगानीस्तानया कुन्दुज व लस्कारगाहय् नं भिडन्त जुयाच्वंगु दनि ।

सेबर्घान शहरया गर्भनर कादेर मालियां बिउगु जानकारीकथं सरकारी सेना व अधिकारीत उत्तरी अफगानिस्तानया विमानस्थलय् बिसिउँ वःगु दु । प्रान्तया काउन्सिलर विस्मिल्लाह साहिलं बिउगु जानकारीकथं तालिबानतय्सं गभर्नरया ज्याकुथिइ, प्रहरी हेडक्वार्टर व कारागार कब्जाय् काःग दु । तालिबानतय्सं विज्ञप्ति पिकयाः सेबर्घान शहर थःपिनिगु कब्जाय् वःगु धायेधुंकूगु दु । थुखे अफगानिस्तानया गृहमन्त्रालयं थप सेना व विशेष फौज छ्वयेत्यंगु दु ।

ग्रामीण क्षेत्रय् कब्जा कयावयाच्वंपिं तालिबानतय्स आः प्रान्तीय शहरत नं कब्जाय् कायेत स्वयाच्वंगु दु । वंगु शुक्रवाः तालिबानतय्स दक्षिण पश्चिमय् लाःगु निम्रोज प्रान्तया जारन्जयात कब्जाय् काःगु खःसा थ्व प्रान्तया बेसक्याम्पय् युद्ध जुयाच्वंगु मदिउनि ।

अमेरिकाया सेना अफगानिस्तानं लिहां वनेगु शुरु यासां निसें तालिबानतय्सं थीथी थाय् कब्जाय् कायेगु यानाहयाच्वंगु दु । अफगानिस्तानया निंतिं संयुक्त राष्ट्रसंघीय दूत डेब्रा लायन्सं अफगानिस्तानय् जुयाच्वंगु युद्ध विनाशकारी जुइधुंकूगु व अफगानिस्तान गम्भीर विनाश पाखे वनाच्वंगुलिं संयुक्त राष्ट्रसंघीय सुरक्षा परिषदं शहरी क्षेत्रय् जुयाच्वंगु युद्धयात पनेत वक्तव्य जारी यायेमाःगु धाःगु दु ।