ने. सं. ११४४ ञलाथ्व दशमी -

कलंकी–महाराजगंज चक्रपथ सतक विस्तार तयारी शुरु

येँ – कलंकी–महाराजगंज चक्रपथ लागाया सतक विस्तारया तयारी शुरु जूगु दु । चक्रपथ लागाया स्तरोन्नति व विस्तार अन्तर्गत निगूगु चरणया निंतिं उगु सतकखण्डय् च्वंगु सिमा पालेगु, मथया लठ्ठा चिइकेगु, त्वनेगु लःया पाइप मेथाय् तयेगुनापं मेमेगु आवश्यक तयारीया ज्या जुयाच्वंगु दु ।

चीन सरकारया ग्वाहालिइ जुइत्यंगु चक्रपथया स्तरोन्नति व सतक विस्तारया निंतिं दकलय् न्हापां सतक खाली यायेगु व वयां लिपा विस्तृत परियोजना प्रतिवेदन (डीपीआर) निर्माण यानाः ज्या न्ह्याकेगु सडक विभागं जानकारी बिउगु दु ।

विभागया विकास सहायता कार्यावन्वयन महाशाखा प्रमुख अर्जुनजंग थापां कनादीकथं कोटेश्वर–कलंकी सतकय् ज्या जूगु इलय् थीथीकथंया पंगः वःगुलिं थुगु सतकखण्डय् नं अज्याःगु हे समस्या व पंगः मयेमा धकाः न्हापा हे सतकं पंगः व समस्या समाधान यायेगुकथं ज्या जुयाच्वंगु दु ।

सडकया अधिकार क्षेत्रय् दुगु सिमा पालेगु ज्या धमाधम जुयाच्वंगु दुसा अन च्वंगु छेँखात चिइकेगु ज्या धाःसा ल्यं दनि । सतकया अधिकार क्षेत्रय् लाःगु थ्यंमथ्यं ४०० स्वयां अप्वः मतया लट्टा चिइकेगु ज्या धाःसा जुइधुंकूगु प्रमुख थापां कनादिल । वय्कःया कथं नेपाल विद्युत प्राधिकरणं सतकय् च्वंगु लठ्ठा उगु थासं चिइकेगु ज्या यानाच्वंगु दुसा काठमाडौं उपत्यका खानेपानी लिमिटेड (केयुकेएलं) त्वनेगु लःया पाइप साले यायेगु ज्या जुयाच्वंगु दु ।

सतक विस्तारया झ्वलय् उगु सतकया थीथी थासय् यानाः नीनिखा छेँ सतक निर्माणया क्रमय् लाइगु थासय् लानाच्वंगु दु । न्हापांगु चरणय् थें मुख्य रुपय् सडक अधिकारया क्षेत्रय् लाःगु छेँलिसें अस्थायी टहरा लगायत मेमेगु संरचना चिइकेत हे समस्या जुइगु खने दयाच्वंगु दु ।
थुगु सतकखण्डय् लाःगु स्वयम्भू, ठूलो भ¥याङ, महाराजगंज चोक लगायतया थासय् सतक सिथय् च्वंगु संरचना चिइकेमाःगु जूगु दु ।