तोखाय् मंकाः कय्तापुजा व इहि

येँ(नेपालभाषा टाइम्स)- तोखाया नांजाःगु धार्मिकस्थल चण्डेश्वरीइ मंकाः कय्तापुजा व इहि ज्याझ्वः याःगु दु । गजराज जोशी ट्रष्टया ग्वसालय् चण्डेश्वरी द्यःया प्रांगणय् उगु मंकाः कय्तापुजा व इहि ज्याझ्वः याःगु खः ।

नेवाः समुदायय् मिजंमस्तय्त याइगु संस्कारमध्ये प्रमुख संस्कार कय्तापुजा खःसा इहि मिसा मस्तय्त याइगु संस्कार खः । वंगु शनिवाः परम्परागत रुपं विधिपूर्वक जूगु कय्तापुजाय् २२ म्ह मिजं व इहि ज्याझ्वलय् ४५ म्ह मिसा मस्तय् सहभागिता दुगु ट्रष्टं जानकारी बिउगु दु ।

थुकथं मंकाः कय्तापुजा व इहि यायेगु झ्वलय् वंगु शुक्रवाः कय्तापुजा याःगु खःसा शनिवाः इहि ज्याझ्वः जूगु खः । नेवाः समाजय् थी मजिउ जुइ न्ह्यः हे मिसा मस्तय्त इहि यायेगु चलन दुसा थ्व तसकं महत्वपूर्ण व अनिवार्य यायेमाःगु संस्कारया रुपय् कयातःगु दु । ट्रष्टं दँय्दसं थुकथं मंकाः इहि व कय्तापुजा ज्याझ्वःया ग्वसाः ग्वया वयाच्वंगु दु ।