थाकुल स्मिथयात

छुं ई न्ह्यः तक ला स्टिभ स्मिथ अस्टे«लियाली क्रिकेट टिमया कप्तान खः । कप्तान धायेवं व बांलाःम्ह कासामि ला जुइ हे माल । धात्थे धायेगु खःसा व तसकं अब्बल दर्जामा ब्याट्सम्यान । टेस्ट क्रिकेटया नम्बर १ थुम्ह ब्याट्सम्यानयात लिपांगु इलय् पुलांम्ह डन ब्रेडम्याननाप तकं तुलना यायेगु सुरु जूगु खः । धयाच्वनेम्वाः, ब्रेडम्यानयात विश्व क्रिकेटया आः तकया हे दकलय् बांलाःम्ह कासामि धाइ । अले थ्व तुलना स्मिथ स्वयंया निंतिं नं तःधंगु उपलब्धी खः ।तर आः वया स्थिति पाःगु दु । आःया निंतिं वयात दछिया प्रतिबन्ध तःगु दु । थ्वयां न्ह्यव वयात छगू टेस्टय् प्रतिबन्ध सजाय न्यंकेधुंकूगु दु । उकिं वं दक्षिण अफ्रिकाविरुद्धया प्यंगूगु अन्तिम टेस्टय् म्हिती मखुत । वयाविरुद्ध आः छानविन न्ह्याइ, अले सजाय न्यंकेगु ज्या जुइ । थुकिया हे झ्वलय् वयात इन्डियन प्रिमियर लिग (आईपीएल) या राजस्थान रोयल्सं तकं कप्तानया पदं चिइकूगु दु ।

अपाय्मछिधंगु मखुगु ज्या वं छाय् यात ले ?
ख“ थथे खः– अस्टे«लियाली टिम आः दक्षिण अफ्रिकाया भ्रमणय् दु । अन प्यंगू टेस्ट म्हितेगु ज्याझ्वः दुगु खः, उकी मध्ये स्वंगू टेस्ट क्वचाये धुंकल । जोहानसबर्गय् जूगु स्वंगूगु टेस्टय् अस्टे«लिया बांमलाक बुत । थ्व सिबें तःधंगु ख“, थ्व कासाय् अस्टे«लियाली कासामितय्सं ‘बल ट्यम्परिङ’ याःगु प्रमाणित जुल । क्यामरां ज्वनेवं स्वयं स्मिथं मिडियालिसे ख“ ल्हायेगु झ्वलय् ‘बल ट्यम्परिङ’ यानागु स्वीकार याःगु खः ।अथे ला ‘बल ट्यम्परिङ’ या ज्या न्हापा नं मजूगु मखु । छगू इलय् पाकिस्तानया वकार युनिस व वासिम अक्रमविरुद्ध ‘बल ट्यम्परिङ’या तःधंगु द्वपं लाःगु खः । लिपा वनाः दक्षिण अफ्रिकाय् भारतया सचिन तेन्दुलकरयात तकं ‘बल ट्यम्परिङ’ याःगु द्वपं लात । थज्याःगु यक्वं उदाहरण दु । तर ‘बल ट्यम्परिङ’यात क्रिकेटय् तसकं तःधंगु अपराध कथं कायेगु याः । क्रिकेटय् बलयात कासाया झ्वलय् अस्वाभाविक रूपं स्यंके मदु, स्यंकल कि अपराध याःगु ठहर जुइ ।

जोहानसबर्गय् अस्टे«लियाली कासामितय्सं गथे यानाः ‘बल ट्यम्परिङ’ याःगु खः न्ह्यसः दनेफु । कासाया ट्वेल्भम्यान जुयाच्वंम्ह क्यामरुन बेनक्राझ्टं कासा दिना च्वंगु इलय् पिनें ‘टेप’ हल, अले उकि तिकेत तयातःगु रसायन बलय् बुलाबिल । अले मेपिं कासामितय्सं उकि चाः तयेगु ज्या यात । थ्व ज्यां बलया छगू ब्व तसकं झ्यातुल, मेगु ब्व धाःसा हल्का जुयां तु ंच्वन । थथे जुल धाःसा बलरयात फाइदा धाइ, थः यथे बल स्विङ याये फइ । टिमया थ्व ज्याया पूरा जिम्मेवारी स्मिथं काःगु दु, अले वयात आः तसकं थाकुयाच्वंगु दु । छगू कथं वया पूरा कासा जीवनय् तःधंगु संकट वःगु दु । थ्व हे विवाद दथुइ वया लाखौं डलरया अनुबन्ध स्यनीगु सम्भावना नं दु । विशेषतः राजस्थाननाप १९ लाख डलरया अनुबन्ध । स्मिथ जक मखु, थज्याःगु स्थिति उप–कप्तान डेविड वार्नरया नं दु । थुकियात पूरा अस्टे«लियाली क्रिकेटं फयेमाःगु लिपांगु तःधंगु सकंट कथं कयातःगु दु ।