च्याम्पियन्स लिग म्यानचेस्ट व पोर्टो पराजित

च्यापियन्स लिग अन्र्तगत क्वार्टरफाइनलपाखे न्हापागु लेगय् जूगु कासाय् म्यानचेस्टर युनाइटेड थःगु घरेलु मैदानय् फ्रेन्च क्लब पिएसजीपाखें पराजित जुगू दु । चोटया कारणं स्टार कासामि नेयमार व कभानी मम्हितूगु कासाय् पिएसजीं इग्लिस क्लब म्यानचेस्टरयात २—० गोलं बुकूगु खः ।

युनाइटेडयात बुकेगु झ्वलय् पिएसजीया केलियन एमबाप्पे व प्रेसनियल किमपेम्बे गोल याःगु खः। जोसे माउरिन्होया बर्खास्त लिपा अन्तरिम प्रशिक्षक ओल गुनार सोल्सकेएरं टिमया नेतृत्व काये धुंकाः युनाइटेड न्हापांखुसी पराजित जूगु खः । झ्वलाक्क ११ गू कासा अपराजित म्यानचेस्टर युनाइटेड १२ औं कासाय् वयाः बूगु खः ।

म्यानचेस्टरया घरेलु मैदान वल्र्ड ट्राफोर्ड मैदानय् जूगु कासा न्हापांगु हाफ बराबरीइ क्वचाःगु खः । कासाया निगूगु हाफया ५३ औं मिनेटय् किमपेम्बेया गोलया ग्वाहालिं पिएसजीं अग्रता काःगु खः । कासाया निगूगु गोल केलियन एमबाप्पे ६० औं मिनेटय् याःगु खः। कासाया अन्तिम इलय् म्यानचेस्टरया पाउल पोग्बां निगू म्हासुगु कार्ड नयाः मैदान त्वःतेमाःगु खः।

म्यानचेस्टर व पिएसजी दथुइ निगूगु लेग मार्च ६ य् पिएसजीया मैदानय् जुइ ।अथेहे मेगु कासाय् इटालियन क्लब रोमां पोर्चुगिज क्लब एफसी पोर्टोयात २–१ गोलं बुकूगु दु । रोमायागु घरेलु मैदानय् जूगु कासाय् न्हापांगु हाफ बराबरीइ क्वचाःगु खः । एफसी पोर्टोयात बुकेगु झ्वलय् निगुलिं गोल रोमाया १९ दँ दुम्ह कासामि जानिओलों याःगु खः ।

जानिओला च्याम्पियन्स लिगय् मारियो बालाटोली धुंका कम उमेरय् गोल याःम्ह इटालियन कासामि जूगु दु । जानिओला निगूगु हाफया ७० औं व ७६ औं मिनेटय् गोल याःगु खः । एफसी पोर्टोया निंतिं छगू जक गोल कासाया ७९ औं मिनेटय् लोपेजं याःगु खः । पोर्टों पेनाल्टीसुट आउटय् बाहेक मेगु कासाय् २६ गू कासातक अपराजित जुयाच्वंगु खः। निगूगु लेग मार्च ६ य् पोर्टोया मैदानय् जुइ ।