रामशेखरया ख्यालःयात कयाः कार्यशाला
ख्वप (नेपालभाषा टाइम्स) – नेपालभाषा ख्यालः विधाया नांजाःम्ह व वर ष्ठ ख्यालःम्व, च्वमि, निर्देशक रामशेखर नकःमिया ख्यालःयात कयाः छगू कार्यशाला जुल । नाट्यकर्मी समाज नेपालया ग्वसालय् वंगु असार ४, ५ व ६ गते स्वन्हुयंकं ‘रामशेखर नकःमिया ख्यालःया कार्यशाला’ नामं उगु ज्याझ्व जूगु खः ।
कार्यशालाय् रामशेखर नकःमिया ख्यालःया थीथी पक्षयात कयाः चर्चा, सहलह व संवाद जूगु खः । ज्याझ्वलय् रामशेखर नकःमिं च्वयादीगु ख्यालः, प्रहसन, व्यंग्य आदिया अध्ययन, विश्लेषण, प्रस्तुति व उकी दुथ्यानाच्वंगु समसामयिक विषय, सान्दर्भिकतायात कयाः सहलह जूगु खः ।
ने पाःया दबूप्याखंलिसें साहित्यया ख्यलय् नं महत्वपूर्ण व ज्वःमदुगु योगदान बियादीम्ह वय्कः छम्ह तसकं लोकंह्वाःम्ह व नासलं लिउम्ह ख्यालःम्वः, च्वमि, स्यल्लाम्ह निर्देशककथं म्हसिउ । वय्कलं ख्यालः, व्यंग्य, प्रहसन, उपन्यास आदि विधापाखें नेवाः समाजय् साहित्यया धुकू जायेके गु व थीथी पक्षयात पिब्वयेगु ज्या यानादीगु दु ।
ग्वसाः खलः नाट्यकर्मी समाज नेपालयाकथं कार्यशालां रामशेखर नकःमिया नाट्य, व्यंग्य, वय्कःया साहित्यिक योगदानया बारे न्हूपुस्तां सयेके सीके फइगुनापं ख्यालः परम्पराया नं संरक्षण व संवद्र्धनय् ग्वाहालि जुइगु विश्वास याःगु दु ।
कार्यशालाय् ख्यालः परम्पराया संरक्षण व प्रवद्र्धन विषयय् वरिष्ठ नाट्यकर्मिलिसें च्वमि राजेन्द्र श्रेष्ठ, ख्यालः, नाटक, हास् यव्यंग्य व प्रहसनय् कलाकारिताया भूमिका विषयय् वरिष्ठ कलाकार आशाकाजी थकूं प्रशिक्षण बियादीगु खः ।
ग्वसाः खलः संस्थाया अध्यक्ष लक्ष्मीप्रसाद चवालं न्हू पुस्तायात ज्वःमदुम्ह व लोकंह्वाःम्ह कलाकार रामशेखरया सिर्जना, योगदान बारे जानकारी बीगु हे कार्यशालाया मुख्य उद्देश्य जूगु कनादिल ।
LEAVE YOUR COMMENTS