परियत्तिया आधिकारिक वेबसाइट संचालन

येँ (नेपालभाषा टाइम्स) – नेपाल बौद्ध परियत्ति शिक्षाया आधिकारिक वेबसाइट संचालन जूगु दु । अखिल नेपाल भिक्षु महासंघया अध्यक्षलिसें नेपाल बौद्ध परियत्ति शिक्षाया शिक्षाध्यक्ष श्रद्धेय फ्राखु विशाल धम्मशोभन महास्थविरं औपचारिक रुपं उगु वेबसाइटया शुभारम्भ यानाबिज्याःगु खः ।

थनया न्हू बानेश्वरय् च्वंगु विश्व शान्ति विहारय् परियत्ति शिक्षाया वेबसाइट शुरु यानाबिज्यासें वसपोलं थुगु वेबसाइटं बुद्ध शिक्षा अध्ययन याये मं दुपिं व जानकारी काये माःपिंत सर्वसुलभ जुइगु बहुजन हिताय, बहुजन सुखायया उपयोगी जुइगु खँ कनाबिज्यात ।

परियत्ति शिक्षाया परीक्षा नियन्त्रक भिक्षु बोधिज्ञान महास्थविरं परियत्ति शिक्षा, पृष्ठभूमि, परियत्ति शिक्षा छु खः, गुलि महत्वपूर्ण जू धइगु खँ कनाबिज्याःगु खः ।

नेपाल बौद्ध परियत्ति शिक्षा, सूचना, प्रविधि तथा प्रचार प्रसार उपसमितिया संयोजक भिक्षु पियरतनस्थविरं परियत्ति शिक्षा वेबसाइट व थुकिया उपयोगिता बारे कनाबिज्याःगु खः ।

इन्जिनियर मनिष महर्जनं वेबसाइटया डेटा बारे जानकारी बियादीगु ज्याझ्वलय् अनागारिका गुरुमां, उपासक उपासिका, पत्रकारतय्सं थःथःगु सुझावत बियादीगु खः ।