पोपपाखें न्हापांखुसी ननतय् यौन शोषण जुयाच्वंगु स्वीकार

इसाइ धर्मगुरु पोप फ्रान्सिसं पादरीतय्सं ननतय्त यौन उत्पीडन याइगु खँयात स्वीकार यानादीगु दु । सुं नं मू धर्मगुरुं पादरीतय्सं यौनशोषण याइगु खँयात स्वीकार याःगु थ्व हे न्हापांखुसी जूगु खँ धाःगु दु । मध्यपूर्वया भ्रमणय् वनाच्वंम्ह पोप फ्रान्सिसं पादरीतय्सं ननतय्त ‘सेक्स स्लेभ’ (यौन शोषणया निंतिं गुलाम) तकं यानाच्वंगु छगू घटना नं लूगु खँ धयादीगु खः ।

वय्कलं पुलांम्ह पोप बेनडिक्टं थज्याःगु हे छगू ननतय् धर्मसभा बन्द तकं यानाबीगु खँ नं धयादीगु खः । पोप फ्रान्सिसं चर्चय् जुइगु थज्याःगु समस्या ज्यंकेगु निंतिं कुतः जुया हे च्वंगु दनि धासें अझं समस्या धाःसा दनिगु खँ नं धयादीगु दु । मध्यपूर्वया ऐतिहासिक भ्रमणय् वनाच्वंम्ह पोपं मंगलवाः पत्रकारतलिसे खँ ल्हायेगु झ्वलय् यौनशोषणया खँ स्वीकार यानादीगु खः ।