येँ महानगरं ‘स्वनिगः विश्वविद्यालय’ चायेकीगु
गणेश व भैरवया निंतिं निवास, नेवानिइ बहुतले पार्किङ, महानगर अस्पताल दयेकीगु
येँ (नेपालभाषा टाइम्स) – येँ महानगरपालिकां स्वनिगः विश्वविद्यालय चायेकीगु जूगु दु । येँ महानगरपालिकाया कार्यवाहक मेयर सुनिता डंगोलं आइतवाः न्ह्यब्वःगु आर्थिक दँ २०८३/८४ या नीति व कार्यक्रमय् स्वनिगः विश्वविद्यालय चायेकेगु खँ दुथ्याकातःगु दु । नीति व कार्यक्रमय् भाषा, संस्कृति, पर्यटन सम्बन्धी विशेषज्ञ जनशक्ति उत्पादन यायेगु निंतिं स्वनिगः विश्वविद्यालय चायेकेगु खँ धयातःगु दु ।
अथेहे येँ महानगरयात खुला व जीवन्त संग्रहालय व र चनात्मक सहर कथं विकास याये गु खँ नं नीति व कार्यक्रमय् न्ह्यथनातःगु दु । थुकिया निंतिं ऐतिहासिक धार्मिक, पुरातात्विक, सांस्कृतिक, सामाजिक महत्वया देगः, चैत्य, द्यःछेँ, बहाःबही, हिति, पुखू, गुम्बा, स्तुपा, चुक, ननि, दबू, फल्चा लगायतया संरचना व सम्पदा स्थलया अध्ययन यानाः डिजिटल अभिलेखीकरण यायेगु, मौलिक नामाकरण, नक्सांकन, जिर्णोद्धर , पुनर्निर्माण यानाः संरक्षण सम्वद्र्धन व प्रवद्र्धन याये गु खँ धयातःगु दु ।
नीति तथा ज्याझ्वः न्ह्यब्वसें येँ मनपाया कार्यावाहक मेयर डंगोलं येँया, ऐतिहासिकता, सांस्कृतिक सम्पदा, भौतिक व आधुनिक शहरी सभ्यतायात मू आधार दयेकाः वइगु दँया योजना तर्जुमा यानागु जानकारी बियादीगु खः । थ्व झ्वलय् वय्कलं येँयात समावेशी, सुशासनयुक्त, प्रविधिमैत्री, सुरक्षित, स्वच्छ, स्वस्थ, हरित व नवप्रवर्तनमुखी स्मार्ट सहरया रुपय् रुपान्तरण यायेगु निंतिं दीर्घकालिन सोच दुगु खँ नं धयादीगु खः।
नीति व कार्यक्रमय् येँयाःबलय् जात्रा याये माःपिं जीवित द्यः गणेश व भैरव च्वनेगु निंतिं नं छेँय् दयेकेगु खँ नं न्ह्यथनातःगु दु । अन्तर्राष्ट्रिय रुपं लोकंह्वाःगु येँयाः जात्राबलय् रथयात्रा यायेमाःपिं मू द्यःगण श्री गणेश व श्री भैरवया निवास दयेकेत आवश्यक व्यवस्था मिले यायेगु खँ नीति व कार्यक्रमय् न्ह्यथनातःगु खः ।
अथेहे येँ महानगरपालिकां सवारी पार्किङ व्यवस्थित यायेगु निंतिं अध्ययन यानाः कार्यान्वयन याये गु खँ नं धाःगु दु । न्हू सतक क्षेत्र व थुकिया जःखः क्षेत्रया पार्किङ समस्या ज्यंके गु निंतिं न्यूरोड गेट लिक्क च्वंगु नेपाल वायुसेवा निगमया छेँ व जग्गाय् बहुतले पार्किङ भवन दयेकेत नेपाः सरकार मार्फत पहल यायेगु खँ नं नीति व कार्यक्रमय् धयातःगु दु । महानगरं थःगु बिस्कं हे महानगर अस्पताल दयेकेगु खँ नं नीति व कार्यक्रमय् न्ह्यथँगु दु । महानगरवासीतय्त गुणस्तरीय व विशिष्ट स्वास्थ्य सेवा बीत महानगर अस्पताल दयेकेगु खँ धाःगु दु ।
महानगरं मिसा, अपांगता दुपिं व ज्येष्ठ नागरिकया नामय् आवासिय भवन दयेकल धाःसा नक्सा पासय् २० प्रतिशत छुट बीगु जूगु दु । अथेहे बालं बियातःगु छेँ, जग्गा, मेमे गु संरचना अनिवार्य दर्ता याये माःगु व्यवस्था लागु यायेगु खँ नं महानगरया नीति तथा कार्यक्रमय् न्ह्यथनातःगु दु ।
प्राचीन बस्ती दुगु नगर दुने होमस्टे संचालनय् प्रोत्साहन बीगु, कुमारी, जनबहाःद्यः र थ सालीगु रुट लिसें मेमेगु ऐतिहासिक जात्रा जुइगु लँपुइ सम्पदामैत्री भवन दयेकेगु निंतिं प्रोत्साहन बीगु खँ नं नीति व कार्यक्रमय् धयातःगु दु ।
LEAVE YOUR COMMENTS