अभौतिक सांस्कृतिक सम्पदा विधेयक टेबुल

येँ (नेपालभाषा टाइम्स) – राष्ट्रियसभाय् उत्पत्ति जूगु ‘अभौतिक सांस्कृतिक सम्पदा (संरक्षण) विधेयक, २०८३ यात बिचाः यायेत संस्कृति, पर्यटन तथा नागरिक उड्डयन मन्त्री खडकराज पौडेलं प्रतिनिधिसभाय् विधेयक न्ह्यब्वयादीगु दु । वंगु शुक्रवाः मन्त्री पौडेलं उगु विधेयक टेबुल यानादीगु खः ।

उगु विधेयक थ्व स्वयां न्ह्यः संस्कृति पर्यटन तथा नागरिक उड्डयन मन्त्री बद्रीप्रसाद पाण्डें २०८२ सालय् राष्ट्रियसभाय् न्ह्यब्वयादीगु खः । अभौतिक सांस्कृतिक सम्पदा संरक्षण यायेगु निंतिं माक्वः ऐन मदुगु कारणं यानाः समस्या जुयाच्वंगु खःसा आः विधेयक वयेधुंकाः कानुनपाखें हे नेपाःया अभौतिक सांस्कृतिक सम्पदा संरक्षण जुइगु विश्वास सांसदतय्सं प्वंकूगु दु ।

टेबुल जूगु विधेयकयात कयाः जूगु सहलह ज्याझ्वलय् न्ववानादिसें नेकपा (एमाले)या सांसद कुलभक्त शाक्यं सन् २००३ य् अभौतिक सांस्कृतिक सम्पदा महासन्धीया प्रस्ताव पेश जूगु व नेपालं सन् २०१० सन्धिइ हस्ताक्षर याःसां उकियात माःगु कानुन इलय् दयेके गु ज्या मजूगुलिं यानाः याकनं न्हूगु कानुनदयेके माःगु खँय् बः बियादीगु दु ।

वय्कलं अभौतिक सांस्कृतिक सम्पदा संरक्षणया निंतिं विद्यमान प्राचीन स्मारक ऐन राष्ट्रिय संस्कृति नीति, २०६७ पाखें भौतिक सम्पदायात जक सम्बोधन व व्यवस्थापन यायेफइगु अवस्था दुगु जूगुलिं अभौतिक सांस्कृतिक सम्पदाया पहिचान व व्यवस्थापनया निंतिं बिस्कं कानुन माःगु खँ धयादीगु खः । उगु विधेयकयात कयाः जूगु सहलहया झ्वलय् नेवाः सांसदपिं रुकेश रन्जित, मदनकृष्ण श्रेष्ठ, कृपा महर्जन, अनुश्का श्रेष्ठ, सुम्निमा उदासपिसं थःपिनिगु धापू तयादीगु खः ।